دور الامهات في بورة البنات!!!!!!

سلموني كتب:

أسالوا ساجور و سنتر ناس حبيبي فلس عشان هم خبرة في المجال
و الله موضوع مهم لكن أنا في أعتقادي أنو دا كلوا سببوا التقاليد السودانية في الزواج و ما يقابلوا من ترف و بزخ في الصرف و حب المظاهر و كدا
وجات الأحوال الأقتصادية السيئة و العطالة ( المستدامة ) تمت الناقصة عشان كدا الجماعة زايغين من الزواج
و غير انو في ناس ما بتزوجوا خوفا من القادم بعد الزواج من مسؤولية و صرف و ارتباطات أجتماعية و عيال و الذي منو
قد تكون الأم من المسببات الرئيسية لعنوسة و ( بورة البنات ) لكنها ليست السبب الوحيدة للبورة
و دمتم
والبورة برة و بعيد

يس حسن كتب:مشكور علي الموضوع سنتر فعلا الامهات ليهم دور لكن المشكله حاليا اصبح انو ما في ذول بتقدم اصلا علي شان يتم رفضه وحاليا اي شخص بتقدم بوافقو علي طول خوفا من البوره عكس الزمن الفات تماما وربنا يستر....

صمت الشوق كتب:بالعكس حاليا بقي يترفض طمعا في الأفضل أو الحبيب فكان في الماضي أذا مارأي الأهل أن هذا الرجل مناسب فهي أيضا تراه ...وزي ماقلت ياسنتر أحد الاسباب فعلا التطلعات بس برضو ماننسي انو في شباب غير مسؤل وغير واعي لذلك افضل الرفض أو كما قلت أنت البوره من ان ارتبط بهذا النوع من الشباب ...والله المستعان

ساجور2010 كتب:يا سنتر

اول حاجه انت امشي اقدم باقي الحاجات التانيه هينه
شكلك كده باقي ليك كم محطه كده والقطر يفوتك

حسن ارابيسك كتب:اضافه لكلام سنتر البوره كانت زمان من سن 25 وكده هسي وحسب قانون الطوارئ المعدل لسنة الفين وخمسه بقت البوره من سن 38 سنه والحمد لله العدلوا القانون ده والا كان حيحصل انفجار بوري رهيب ..
لكن لتحوير الموضوع بشكل جوهري ما هي الاسباب الحقيقيه وراء عزوف الشباب عن الزواج (مافي زول يقول لي القروش وما ادراك)
حسب فهمي ان السبب المباشر للعزوف عن الزواج هو فقدان الجانب الروحي الحقيقي الدافع للزواج (ما قاصد الحب) يعني بمعني اخر لو سألت اي شاب انت داير تعرس ليه حيقول ليك داير استقر .. هل هذا هو جوهر الزواج ؟ واخر يقول ليك صونا لنفسي من المعصيه طيب ما في رجال معرسين وغرقانين في المعصيه وواحد تاني يقول ليك داير لي ولدين يشيلوني وانا كبير طب ياخ ممكن ما تنجب حتخلي المره يعني .. عموما لكم التعقيب ولي رجعه حول الجوهر المفقود في الزواج

نونا كتب:أخي سنتر
بصراحه موضوعك جميل وشيق جدا
بس مااعتقد إن الأمهات عندهم دور في بورة البنات
لأن أي أم عايزه تشوف ابنتها مستوره وفي بيت عدلها
بس دا مامعناه إنها ترمي ابنتها في يد واحد من الشباب الطايش اللا مبالي بس عشان تزوجها قبل مايفوتها القطار

زي ماقالوا أخطب لابنتك وما تخطب لإبنك وماعيب إذا اختارت الأم العريس الصالح لابنتها لأنها قد ترى مالا تستطيع البنت رؤيته
والأهم في الموضوع دا كلو إنو يكون العريس في المقام الأول صاحب أخلاق ومثل وقيم عليا ويخاف الله
بغض النظر عما يمتلكه من أموال
وما أعتقد أبدا إن الأم لو لقت كل المواصفات دي في العريس ترفضه بسبب فقره
واستنادا على حديث رسولنا الكريم
‏(إذا أتاكم من ترضون دينه وخلقه فزوجوه )
وبكدا تتحل مشكلة البوره
أسأل الله التوفيق لكل البنات بالزواج الصالح
ولبعض الأمهات بالهداية
ولجميع الشباب بالتزام الصدق والوفاء بالوعود
ودمتم