تخيل كيف يكون الحال لو ما كنت سودانى

تخيل كيف يكون الحال لو ما كنت سودانى:!!!!!!!!!
*************************************
كنت ح تلتزم بالمواعيد - كنت ح تدفع فاتورة المحامي او الطبيب قريبك - كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد - كنت حتنطق حرف ال (ق ) و ال ( غ ) كما ينبغي وما كنت حتقول للتسعة تزعة - كنت بطلت تسف ساعوط - كنت صرت متخصص وعالم في مجالك - كنت حتلبس شيك جدا عند خروجك أمام التلفاز وأجهزة الاعلام - كنت تتح...دث بطلاقة وإنسيابية بدون أ أ أ أ أ أ
ولو ما كنت سودانى كنت عرفت ان بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك ودرست الجامعة بالكلية التي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس .. كنت حتتصل بالتلفون قبل زيارة أحد في منزله بدري شويه , مش و أنت في خشم الباب ده طبعا لو اتصلت وما جيت داخل زي قدر الله بدون حتي ماتدق الباب وتدقو ليه ؟؟ مش في سلك تجرو وتدخل !! بدون مراعاة لحرمة البيت
ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري.... كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!! واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم .. والطامة الكبري لو كان عندهم حوض سمك و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...كنت ح تتردد في إعطاء رقم تلفون أو عنوان شخص ما.. دون إذنه او حتي سؤاله اذا كان عندو رغبة يتواصل مع الناس ديل أو مفهمم انو ما عندوا تلفون من اصلو بدل تورطو وتحرجو كدة!!! وكنت امتنعت عن السماح بجلوس طفلك الرضيع في المقعد الأمامي على حجر والده او والدته ولمن يحصل حادث الحبيب ياكلها لا لذنب جناهو سوي انو اهلو سودانين!!...كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء على امل انك تمشي وتخليهم ينومو وانت برضو قاعد تبرا فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي
ولو ما كنت سوداني ...كنت ح تخلي الصغار في البيت عندما تكون المناسبة مناسبة كبار.. كنت اتونست بصوت معقول, خصوصا|| عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت...كنت امتنعت عن التدخين في منزل شخص اخر , او على الاقل استأذنت قبل ما تولع...كنت ترددت في ارسال حاجات وزنها خمسة كيلو وما فوق مع كل من تسمع بأنه ماشي السودان... كنت رجعت القروش اللي استلفتها في وقتها, أو في الحقيقة رجعتها و بس.. كنت امتنعت عن زيارة احدهم في مكتبه , للونسه او مناقشة امور لا صله لها بالعمل كنت خجلت من عدد المسكولات التي تعملها, مش كمان تقول ||شنو يا فر دة, خمسه مسكولات ما ترد عليها؟ و الله الفيك اتعرفت||..... كنت حا تقعد فى صالون الناس بدل تلوص فى البيت كلو.. كنت حا تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك( لو كان فى يعنى) ..
كنت ما حا تمشي مستشفى الولادة وتقعد تحقن النسوان الفي العنبر كلهم والله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج .. اصلا انتو البوديكم شنو مستشفي الولادة؟؟ عشان تودو نسوانكم اوكي آمنا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام استنو لمن تطلع في البيت أما لو كانت اختك او زوجة اخوك ياريت الزيارة تكون من طرف الأوضة وتتوكل علي الله ...
ولو ما كنت سوداني كنت بطلت تطلع بالعراقي والسروال والسفنجة وراسك مكشوف وصوتك يجيب الطاش..
لو ما كنت سودانى ما كنت اكلت ميراث اخوانك الصغار واستوليت على بيت ابوك لي يوم يبعثون عشان بس انت الكبير!!
ولو ما كنت سوداني كنت إبتكرت فى خريطة بيتك بدل تشف حقت صاحبك بالكربون وكنت استثمرت فى حاجة غير الركشة !! ومحلات الاتصالات !!
لو ما كنت سوداني ما كنت أخدت معاك كتيبة وانت ماشي المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بي دهب البيت كلو ولابسين الاحمر والاخضر والترتر وزفة الوان ما شفناها حتى في أعتى صحن سلطة ده غير شباشب الظار البرتقالي والليموني وهلمجرا ، وشفعكم يكوركو ويتساككو ، ده غير التحنيس والدناءة عشان يمشو ليك الوزن !!!
ولو ما كنتو سودانين كنت قعدتو محترمين فى الطيارة وما قرفتو المضيفات بي الطلبات والاصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والاصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الاحزمة ووقفتو قبل الطيارة تنزل..
لو ما كنت سوداني ما كان ممكن تدخل فى زول شمال وتقول ليهو راتبك كم؟؟؟؟
ولو ما كنت سوداني ما كان ممكن تفكر انك تمشي عرس بتاع ناس وتقيف بكل بجاحة تصور العروس بى موبايلك وانت ما بتقرب للعروس ولا حتى بى حواء وآدم بدون ما تسأل نفسك منو الأداك الحق ده في إختراق خصوصيات الناس ومنو السمح ليك تدخل وتتعشى وتصور !!!! ..
ولو ما كنت سوداني ما كنت طلعت من شغللك ولمدة تلاتة ايام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاي خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع تافه ما بياخد اكتر من عشرة دقايق!!!
لو ما كنت سوداني ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه ؟؟ كفاية عندهم سوداني مغفل زيهم يرسل بدون تفكير ..
ولو ما كنت سوداني مستحيل تدي اخوك يبني ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو اهلك زاتهم سودانيين ما كان غلطوك وطلعوك انت الكعب!! وجبروك تسكت عن حقك وطلعت من الموضوع بي ازمة نفسية!!
صدقنى لو ما كنت سوداني كانت حياتك مشت بى أريحية ونظام وراحة كانت مجاملاتك حتكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!.. كنت نمت لما تحب وتصحى لمن تحب.. كنت انت القررت مشروع زواجك بمن تحب بدل القبيلة كلها تقرر معاك.. ويجزمو بأغلظ الإيمان انو فلانة هي البتناسبك !!! عرفو احتياجاتك كيف؟؟ ميولك كيف؟؟ طلبك كيف؟؟ انا ما عارف!!!! كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!! كنت استمتعت باجازتك وبي وقتك وحياتك بدل كل واحد يديك الفتوى الفي دماغو ..
لو ما كنت سوداني كنت حتكون سيد نفسك وكنت...