حصاد الحروب

كل الرخم ..
كل الصقور ..
كل الحدى ..
كل النسور ..
كبر الجوارح فى المطور ..
والصاقعة فى عز الهبوب
رحلت جنوب ..
تعزل من الرمم المفقعة ..
فى حشا الاحراش
مجدعة دون قبور ..
الارض زى يوم النشور ..
قيزان من الناس يترعوا
بخت الكلاب ..
بخت الصبار ..
بخت الصراصير والقعو
بخت الباعوض ..
بخت الجنادب وارتعو
ياكل ديدان الارض ..
ما تشتهى الانفس هنا
فى العاد يلوكو
العاد يسفو
اليبلعو ..
كبد الزنوج الوارمة
لسنات العرب ..
كلو البجا المى سالمة
ياغربان مصارين الحلب ..
فشفاش ولاد النوبة
يا ديدان قلوب
ناس بحرى والجزيرة
كيمان العصب
زى القصب ..
قطّن كيانه
الريح يلوج بو يفرزعو
رقشة خيوط القرمصيص
الدود ينعمش فى اصبعو ..
كان اصبع وتر
اصبع علم ..
وكتين فوق للمدرس يرفعوا ..
اما الدموم ما بتنفرز
ما انساطوا وكتين ترعو ..
شهدت سحابات البلد
انو الجميع قبال يموتو بدمعوا ..
مش كلهم طينات غلابة
على غلابه ووقعوا ..
الغباء خرابة فى ها الحرابة ..
تمن عذابه ..
بلانا مين البدفعوا ؟
ساقط قوانين الضهب
الزول يعاين الزول
مخادعوا ويتبعوا ..
كربا كعب ..
ويا الله كيفن راح يكون
حال التعب ..
ديل لو وعوا ..
المافى داعى لها العفن..
وان ماكضب
يسالنا الله عن الوطن
قبل اى شى ..
الله الوطن مش وزعو ..
وخلق البيفصح والرطن ؟
وراهو ما معنى أصبعو
وقيمة وشي ..
حتّان نزل دينو الحنيف الشرعوا ..

خلوني في رزقي الجحيم
واتهنوا بي ذات النعيم
واستمتعوا ..
ولاّ أسمعوا ..
مبسوطة بي عشقي القديم ..
وآب ينهرد شان أجضعو ..
وبالزي دا وصاني الحسين ..
أتبع كُتر ولاّ أتبعو ؟؟

وبنقر بعيد حساً دنا
ما مستحيل تحت العنا
تنفخ في أبناء السبيل ..
فجراً تكرهني الغنا ..
تقدر كتير تقدرني أنا ..
تقدر طيوري تطفشه
وتاذى الجنى ..
مش عد تشيل النيل
يخرب ما تشاء من أمكنه ..
بي كم قتيل
تقدر تدوم عمراً طويل
في السلطنة ..
باسم الله ولا الشيطنه
وآرد حراق نص البلد
في جنح ليل ..
بس مستحيل أن تجبر
الأبنوس غصب يصبح نخيل ..
والعكس ،، لا تتعب تجر
خيط الفجر تالا الأصيل ..
خل الوطن ياخد
براحو كما الخميل ..
من كل لون تابر جميل ..
ويا عدرائيل ..
لو كل طلقة بدل أويل ..
تمشي إسرائيل ..
كان هسة في الأقصى
بنصلي قبل عديل ..
ضحينا كان في بيت لحم
نهني بعضنا في الخليل ..
ونغني عازة وراء الخليل ..

سمحات خلاص
بنوت بلدنا وكت تشيل ..
غنوات بدل صرخات عويل ..
يا عازة ناراً في القلوب
موقودة سموها الجنوب
بالعافي يطفيها الجليل ..
أحلم معاي كالنيل عديل ..
من غير غرق
إنو الوطن يصبح وطن
ولو مستحيل ..
من دون عرق
وإنسان درق
لي دم يسيل ..

وانذكرت
سفر الحسين
المنّو ما جا من الجنوب
وبكت فطين
ما كان دا توب !!
بكت الرجال الماها
ساكتي على الغلط ..
بكت الزمان القط قط ..
بكت الرضية مع القضية
الراقدي برة مع الحيط ..
عز السقط ..
بكت البيوت بكت الأيادي
التبني مستشفى وتموت
بالسل فقط ..
الترصف الشارع زلط ..
وما تلقى تتعدى وتفوت
من كركبات الأرزقية المترفين
التالفين الساقطين ونقط .. نقط ..

سالت دموع ديش من فطين
يشكن خوازيق الحروب ..
عينيها كانت في الشمال
والدمعة تنشايح جنوب ..
ينصر دموعك يا فطين
على كل آفات القلوب ..