الشاعر محمد الحسن سالم حميد

بعض الروائع من اشعار الاستاذ حميد

رسائل ست الدار بت احمد جابر
رسائل ست الدار بت احمد جابر
للزين ود حامد
( تلغرافات )
محمد الحسن حسن سالم (حميد )
( جواب أول )
باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير
أم أولادك ست الدار بت أحمد جابر
رد منه ( جواب أول )
ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان
(جواب ثاني )
( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطاة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطاة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد
من تنقاسى والبركل ولى العفاض
من عند أوسلى لى الحوشاب
لى عند نورة والحيران
قشابى الشامخى والكرفاب
ومروى السمحى ماب تنفات
كريمى السوق ولى الدومات
وتغشى الزومة والحاجاب
قريرنا النايرى أم شتلات
حزيمة وكورتى شيخ وراق
الكنيسى العامرى بالأيمان
ولا مساوى والدبة
حجير ومقل
بخيت وشرق
دبيبى وبقعة ابرنات

آه يا غُبُشْ

آه يا غُبُشْ
ما عندي ليكم غير نغيم ..
برجوه ينفُض
لي غبار زمن القسا ..
الكتّاح
يهِزْ عرجون نخل صبر الغلابة الطالْ ..
يحِتْ يخرِتْ ..
تباريح الأسى
الممدودة فوق نور الدُّغُشْ
يا نورا آه ..
يحرَد كنائسنا المسيح ..
يعرش مدارسنا الصّدى

ييبس .. يباس
حلق العصافير الوديعة من البُكَا
يندَرْدَرْ الصّوت البعيدْ ..
أسيان يصُد من دون صدى
ينكَفْرَنْ الفجر الصّبوح ..
يحمي الزهيرات الندى
تختا الدراويش الضّريحْ ..
يسكن خلاوينا الجنون
يهجر جوامعنا الإله
يا نورا آه ...
تطرح غيوم الشوق تئِنْ ..
تشرَقْ
تموت
خيل .. كلمة الحق التّناهِدْ في الشِّفاه
تعقِر بسيمة الصِّحْ
مع لوبي الجّروفْ
تغرِزْ ضريعات الحروفْ
ينشف مُرَاح الأمسيات ..
تتمطّق الأرضة المروق والأغنياتْ
اللّي الشّروق ..
والأرض
والحب والمطر
تضْهَب تتوه ..
وكتين يضيع عرق الجِّباه الشُّم ..
شمار في مرقة
آه يا نورا آه ...
من دّرْبِكْ التّور نَفَس خيل الصّبُر ..
فَتّر خطاوي الشّوق وراه
يا نورا آه ...
ساعة الشّموس الغُرْ .. تهضلمْ
تلحق الصِّح في المغاربْ
تدفر الضو الكهاربْ
في وشيّكْ
تذفر المدن
الضّبابية
السّرابية ... الكآبة
وحائط التيِّه
والطّشَاشَات
فوق قِفيِّكْ
يا أم عوارض .. مو دعاشة ..
ماها شبّورة وتقيفْ
جايي ليك يا نورا غيمة ..
تملا ماعونك خريفْ
يملأ عينيك ويفضِّلْ ..
يروي جوّاك ... العطاشة
مو دعاشة
.......
يا مطر عِزْ الحريقْ
يا مصابيح الطّريقْ
يا المراكبية البتجبِدْ
من فَكْ الموج الغريق
يا الجزاير النتحويبا ..
لما إنشعوز بحرنا
جينا ليك والشوق دفرنا
يا المراسي النتحويبا ..
لما إنشعوز بحرنا
يا نشوغ روحنا ودمرنا
يا المحطات الحنينة ...
القصّرَت مشوار سفرنا

يا ما شايلك بيني حايمْ
أيوة شايلك .. بيني حايمْ
في الأرِضْ تكوين قضيّة .. !!!
في السّمَا الأحمر .. غمايمْ
بي برِدْ نغما السّلامِي ..
رَطّبَتْ حلق الحمائمْ
طنبر النّخل التبلدي ..
راقص الأبنوس وصَفّقْ
سَوّتْ الصقرية موجة
خَلّت النِّيل هاجلو هوجة
بشّرت بالخير بلدنا ..
شالت الشّبَال نسائمْ
جدّدَتْ زلفي القديم ..
أمشي بي الماشيبو أقاوم
لا بتكَبِّر راسي فورة ..
لا بتصغِّرني الهزائمْ
جِنْس يا نورا ابن آدم
حلمو في عالم مسالِمْ


لا اللّيالي الماها ليّا ..
لا الشّمَاتات العليّ
لا البنوك المخملية
لا تفاهات الحضارة ..
لا عفاريت المدينة ..
لا العمارات السّوامِق ..
فوق ضَهَر ناساً فقارى
لا الهتاف الفاوة ضارى
غطى بالي من الفوارق ..
لا الألوهة الطوطمية
لا البرندات الوسيمة ..
ولا الأسامي الأجنبية
بتمحى من عيني ملامحِكْ ..
وإنتي جاية المغربية
جايي دايخي المغربية ..
وشِّك المقبول مكَنْدَكْ ..
سامسونايتك زمزمية
كونشبر ..
مرزبة
مقطع
ريشة فانوساً مدَرْدَحْ
قلت بيهن لي زمانك ..
يا زمان الحاجة عندكْ
يا زمان الآفة حدّكْ ..
لا تطا الوردة الصبية

يا نفس فجر القصائد .. يا بلادي
القَطَع قلب الرّوادي
باللُّواج الجاي وغادي
ده ما هو صوتِكْ .. لاها صورتِكْ
دي البترقش
ناديي فوق صدر الجرائد ..
ماها صورتك !!!!
لا هو صوتك ..
لاها صورتك !!!

إنتي يا الفي إطْن الصّحَارَى
شُفّع العرب الفتارى
البَفِنّو الشايلا إيدُنْ ..
ويجرو كابسين القطارة
يجرو باريين القطارة

لا سراب الصّحراء موية ..
لا حُجار سلّوم موائدْ

إنتي في الغابة اليصارِعْ ..
جوفو للآهات تلكِّي
ياما دفّقْ غيم رجاهو ..
لكن الأيام كركِّي

في خلا حالنا اليمحِّن ..
ويملأ بالسُّهد الوسائدْ
إنتي غيمة ..
شديرة ..
خيمة ..
إنتي جاهنا ..
والتّقَا الطّلَقَت وشينا ..
فرّقَت غُمّة جباهنا
فرّجت في الحارّة ضيقنا
فرّحَت شُفّع فريقنا
والمواعين الحزينة ..
وإتجاهنا
يا النغيم البقّ فينا ..
وشدّ لي وتر إنتباهنا

يا تباشير يا بشارة
إنتي يا ضرعاً تَكَرْمَشْ ..
شان يرضِّعني الجسارة
إنتي في منفاي رفيقة ..
وفي حشا الأشواق حرارة
يا هُدَى النّاس الحيارى
يا ندى الفجر اليبلِّلْ
صور عوينات الفقارى
جاي ليك ..
آه جاي ليك ..
يا نورا آفة
آفة للسوس الجا ينقُرْ ..
عود عشيماً داخرو فيكْ
وأصلي لمن أدور أجيك ..
بجيك
لا بتعجِّزْني المسافة
لا بقيف بيناتنا عارِضْ ..
لا الظُّروف تمسك في إيدي
ولا من الأيام مخافة

يا نفس فجر القصائد ..
ما ضِهِبْ في بُعدي عنِّكْ
واصلي متغرِّب عشانك ..
راضي بالبيجيني منِّكْ

ما بكيت شُحْ اللّيالي
لا شكيت نُحْ .. شلتو حالي
رغم إنو الحال بيفسَخْ ..
إلا كُت في الحارة بصرخ
يا وطن عِز الشّدائدْ
يا وطن عِز الشّدائدْ

الضؤء وجهجهة التساب

ودَّاها فوق قُوز الرماد
كان ظنُّو يوم يومين تلاتِة
المُوية تنزِل والبحرْ يشرد شُراد
يفضل تَرا .
يبراهُو بالسلُّوكة من ورا
والعِيوش والخير يعم يرقد رقاد
والناس تخُمْ خمّ السرور ، وماهُو البرا ..
ناساً كُتار فاكرين كدِي .
يومين تلاتِة ، الحالة ترجع حالَتَا
ويبنوا البيوت هُو وشفَّعوا وأم الوِلاد ..
ينجمَّعوا ، ويسترجعوا الماضي وشتاتات السواد في صالَتَا ..
شِيتاً ضحك .. شيتاً بِكِي
ويبقى الخراب دا رهاب رِهابْ
عِبرة وحكاوى بتنحكي ..
بلدك مِتلْ كمِّين بلادْ ..
بدت الدقون فيها الخَتَا
نجَّس تراها المُتْرَفين .. كِترتْ مواعين الفسادْ
وكان كلمة الإسلام غُتَا ...
جاتْ الَلَتْ الله وشالتا .
**********
كان ظنُّو يوم .. يومين .. تلاتِة ..
مشى السِبُوع والتاني جا
والمُوية كلما ليك تزيد ... ويقلْ رجا .
قوز الرمادْ الكان قِريْب .. فات بعيد بقى ماب تخُوجْ
قوز الرمادْ ... يا الضوْ فِضِلْ جزيرِة ضاربْ فيها مُوجْ
وحصار حصارْ كيف النَجَا
عاينْ البلد دي دمار دمار .. فيها إيش فِضِلْ ؟!
لعبة قصب فِ إيدين طفلْ !!!؟
الحِيطة وكتينا الـ
ـتـ
ـقـ
ـــع
تقع ألفِ وجعة على الضُلعْ ..
دخانه يمرق في السما .. آهاتو تنزف في الأرِضْ
بحر الصَبُرْ والاحتمال بيناتو ينقطَّع تُرعْ
لا يلقى يربُط لا يحِلْ .
لا حولة يا الكتب .. الكراريس .. المكَرِّنِة في الشتِلْ !؟
التَخْتَة .. أقلام الرصاص .. كنَب المدارسْ .. كُور يلُوجْ
باب الفَصِلْ كاسح بو موجْ
لا قوَّة يا ورق الجرائد .. يا المصاحف ؟؟
والصحيحات .. المَجَخْسنة في الذِبلْ ؟؟!!؟؟
ورافعين دواليبن بعيد .. طابلين خَوازِيقُن طَبِلْ !!
لا حولة .... حال ... ماب تِنْقَبِلْ ؟؟
يا مسلمين ؟؟.......؟؟
وين لي تَسابْ عشرة وتَسابْ كم وأربعينْ ؟
دا يمِين خرابْ كمِّين سنة .
يا الضوْ .. مِنُو الفي الكون يصدِّق كان هِنا
ليلة ذِكرْ .. حلقةْ مديح .. دارةْ غُنا ..
هيصة ورقيصْ .. القرمصيصْ .. سيرة عريسْ .. وحلاةْ عروسُو محَنْنَة ؟؟
يا الضوْ .. مِنُو الفي الكونْ يصدِّق ؟ كان هِنا
شُفَّعْ بيلعبوا جَمْ بَعَضْ .. دِيكْ لِفّتُنْ .. في الدِشِّي _ غَبْشِي _ مَشكَّنَة
واللاَّ الشَتِلْ خايِفْ لها .. فارِدْ ضَفايرُو وحاضِنَا .
فِيقْ ... لا تضيقْ
باتْ الفَرِيقْ بَهَجِي ومَتَمْسَحة بالمِي .. وين يا الضوْ نَقاقِير الهَنا
ووِيننْ مشاوِير الفرحْ .. غَزَلْ البناتْ .. الهُودَنَة ..
حَشْ البراسِيمْ العصُرْ .. الليلْ .. وَنَسْتُو .. الشيْطَنَة ؟؟؟
وعِندْ الفَجُرْ كمْ مِيضَنَة ؟!؟
وهَذَرْ التلاميذ _ الصباح _
بِي جَمْ رواكِيبْ الحَلَبْ ؟؟
يا الضوْ بِيُوت الناسْ حياتا مَبشْتَنة ؟؟
الحِلّة كلَّها في البحَرْ !
كَسَر البحرْ .. ؟؟ ..
ولاَّ انتَحَرْ قلبْ المياهْ ..؟ ..
واِنكبَّ قَبَلَكْ وحْدَكْ ؟؟؟.
ضاضاك فِ بلدكْ شرَّدَكْ
نَفَدتْ قوافلْ الأغنياء .. وجملك على الحصْحاصْ بَرَكْ ..
مرتاح حمامُن في البروجْ .. وإنت أب حماماً طاشْ يلُوجْ
لا سوَّى عشْ .. لا ركَّ .. رَكْ .
يا الدنيا .. كيف مِتْقلْبِنة ؟!
تصحَى العصافير الودِيعة ، مع الصباحْ مِتْخلْقِنَة !
وشرْ الكلابْ مِتْمسْكِنة ؟
وين نْرَّتا وهِوْهِيوَا وينْ الليلِة غابْ ؟
كلبْ الجَنائنْ زيُّو زيْ كُل الكلابْ
كلبْ الغلابَة المُسْتَغلِّينْ العَبِيدْ .. الليلِة سِيدْ .. سيِّدْ مُهابْ ..
كلبْ أبْ زَهانَة تَهِينُو هانة ، مِن المهانة تقولُّو تَكْ .
حُكْم اِنقلاباتْ التَسَابْ !؟!
دوَّارَة .. دنيا فَرنْدَقسْ
نِنْجارَى فيها سبقْ سبَقْ .. نخسرْ بعض في هِينْ ترابْ
نتلاوَى عند فتحْ اللَبَقْ .. فاكرين برانا أهل العقابْ
تارِي البحرْ .. عَوَّافِي .. عندُو معانا حَقْ ؟..؟
يا الدنيا .. زيْ سكْرَة وتَفِكْ مِنْ راسُو فَكْ .!.
بعضْ المسافاتْ اِتْلَغَتْ
الفارغِة طَنْبَجَا والملانِة اِتفرَّغَتْ ..
الدَنْدَهُوباتْ زيْ بعضَ ..شكل العِديدِى ورَصّها
نَفس العَنَاقْريب نَفْسَهَا
عَفَشَك دَة ، حَقْ غِيَرك تَشِك .. يَدَخل فى بَالك أَلفْ شَكْ
مَا الحَالة اصلاً مِن بَعض
حكم إنْقِلابات الَتَسَاب
الدِنْيا كُلَهَا حِلّتك
تَنْضُم مَعَ اَلَفِى آخْر الَبَلَد .. مِن غِيْر تَفُوتَا مِحِلّتك
تَحْكِيْلُو قِصَة تَقِصّها
إِنْ نَفَسُو فِيْهَا تَحِسّها
إِنْ مَاها فِيْهَا تَحِسّها
حَتَى الأحَاسيِس نَفَسَهَا
مَا الَحَالَة كُلَهَا مِنْ بَعَضَ
إِلا الَمَسَاخِيْت الَدِقُون ... خَتَوُهَا بين أَهَلَك قَرَضَ
بالَدِيِن وبالَطِين بالَنَسَب ... بالَمَيكْرَفُونَات بالَخُطَبَ
بالَبَنْطَلُونَات بالَرُتَبْ
فرِّق تَسُد
تَاخُدْ قَنَادِيلَك تَفُوت .. وإنْكَتَلُو فِى حِزْمَة قَصَب
ويَوْم التّصُد تَلَقَى الَبِيُوت فِى أزْيَارَهَا بَانِى الَعَنْكَبُوت
والَحِزْمِة شَاَهَد فِى التُّرَب
حَرَسَك يِظَمْبِر مِنَهَا
وفَرَسَك يكُد .. لا اسَيَادَهَا تَسَأل عَنَها .. ولا زُوْل يَرُد
أرْخِيلِى اضَانِكَ يا بَلَدَ
مَرّة اسَمَعِينِى مِن الَبَعِيد وإنْطَارَشِينِى وللابد
فِى حَبْلى مَاتَت شَتَلتِى .. مَاْت بيْتى مَاْتَت حِلّتِى
لَكِنِى يُوم مَاَت إِتْولَدْ جُوَاَى الفَ إنْساَن جَدِيْد
وانَا ذَاِتِى مِن ذَاتِى إِتْوَلدْ
وَرَتْنِى مَلَتَى مِلّتى
والمُوْية بَدَلت الوجُوه
يا بَادِى مِن بيتَكَ تَتُوه
تَضهَب ضِهِب
لَوْ بَاَبُو مَافى أو العَتَبَ
تَحَسِبْلو مِن قَوْز الرَمَاد
أو بِيْت أمِيْر المُؤمنِين الِلِسة حِيطُو تَسِوى رَبْ رَبْ در.. دَرَبْ
والَدنْدَهُوب إنْدَكّ دَكْ
هَرَسْ القَزازْ .. المُوية جازْ .. والجازْ وَدَكْ
بِينُو الدقِيقْ إتْلكَّ لكْ
ضِلَفْ الدَواليب الكُبارْ .. عائماتْ خَشَبْ
المُكْحَلِة .. الكُشتينة .. مِيزانْ الدهبْ !!
ضُوقْ الغضَبْ .
ضُوقْ المَذلَّة الدُسْتَبا الناس العُزازْ
سِيدك دخرنالُو المطرْ .. أمَّا إنت يكفيك الرزازْ
خدرّتَ تاني يجي الجَرادْ ..
أقوى الحقيقة من المجازْ ..
وهِنا المحكْ .؟.
يا أرزقي .. يا نسلِ حمّالةْ الحطبْ
يا مستفيدْ مِن بذَّةْ أطفالْ السوادْ الما نزلْ فوقُن ملكْ
بالسُكرْ .. العيشْ .. السمادْ ؟؟؟؟!
المُويَة أوْلى من العبادْ ؟
في ياتْ كتاب دين ياتْ حديثْ .. يا فاجِر الله بيسألكْ ؟
يا حَسرةْ الإتغشَّى فيك ... كَبَّر وراكْ ... جاهد جهادْ ...لامن هلكْ
يا حَسْرةْ الصدَّق صلاتكْ .. وموعظاتكْ في الفسادْ .. بان الشَرَكْ .
أيْواتَ ليك ..
أيْوَة ... أيْوَة .. يا بحرْ التسابْ ما أعدلكْ .
شُكراً جزيلاً يا بحرْ .. رغم الكَساد
بحَّتْ لنا العَفَنْ المَكرِّنْ في الزمنْ من عهدِ عاد
والضوْ وليداً ما قرا
خرَّجتو منك باقتصاد ... قانون ... فلكْ
جَفَّ المِداد ..
ما أعدلكْ .
جَفَّ المداد ما أعدلكْ
ما أعدلك ... ما أعدلكْ
بالسكَّر .. العيشْ ... السماد
المُوية أوْلَى من العباد ؟
يا شارعْ الثورة القصاد أهلي المسالمينْ البعادْ
يا بندقيتو ...هِنا المحكْ
وقَبَّل على القِبلة ونَدَهْ
قُبَّالْ يمد إيديه إنتَبَهْ !
حِسْ المطرْ .. بين الشدرْ .. والضوْ مع الفيها إنشَدَهْ
بَرَّة ..... المطرْ
في الدَنْدَهُوبْ برضُو المطرْ
خَتَّ البِرِشْ فوق راسُو ... لكِن المطر
أوْوْوْوْ .. والهوَا
وراسْ تمرة فوق عَقَشْ المسكينِة
الجَرِيدْ رمَى دَنْدَهُوبا .. العدِّة فاتتْ بالبحرْ
بِرِشْ الصلاة اللافْحُو الهوا .. وإبريقْ يثرثرْ بين كَررْ
يا الله سِتَّها في السفر
والضو ينط من دنْدَهُوبُو ... يجيبُو صاد صوت المطرْ
في إيدو كوز .. سبْحِة و كَكَرْ .
حَلَّةْ مُلاحْ .. كرَّاسْ غُنا .. إعلانْ قضية .. عِلمْ طلبْ
.. بروازْ قديمْ .. حاضن عَروسْ وعريسْ وسيم بين كمْ نفرْ
السِبْحة والكُوز .. مُو اللَتَا
تشبهْ أمير المؤمنين .. باكر يقولُوا سرقْتَها
فنـَ ــنـَـ ــنْْْْْْ ... يفِنَّها في البحرْ !؟
أقوَى البحرْ .. واللاَّ المطرْ ؟ أوّّوّّ والرياحْ
بتَصحِّي في الجو الجراحْ ... بِتَحِتْ من الجوفْ الفِكَرْ
إشْْْْ في الوعر ..
عِشْ قُمْرِي بي فرخِينُو كان من حظ وَرَرْ
يا رازِقْ الحيوانْ أخُو ...؟!؟
يا رازقْ الحيوانْ أخُو .. الينْجَا مِن كِيد البحرْ .. ما ينجَى مِن إيد المطرْ
والينْجَا من إيد المطرْ .. ما ينْجَى من كِيدْ الرياح ..
والينْجَا من كيدْ الرياح .. ما ينجَى من كيد الفِقَرْ ؟؟!!؟؟
يِي .. دا القدرْ .
ما أعتى حربك يا بشرْ .. إنت الغريبْ
والموج يشيل غادي ويجيبْ
ينكَرْبَشْ النيمة الدَبيب ... والضوْ مُو جايب لك خبرْ
طقْْ ..
دندهُوبْ ناس ستِ نُور .. عودُو إنكسرْ .. وفاااات بالبحرْ
تِحت السماوات ما في أرِضْ
في الموية .. في الريح .. في المطرْ
في الدَابِي .. في التمْر الخطرْ
وإنسان يصُبْ _ قبل السمِا _ عرَّاقِي والوشي والشَعرْ
غيَّرْ وقفتو .. الدندهوب زالَفْ هَبَرْ
يا غيمة ..هوي .. دا وكِتْ مطرْ ؟؟
واِرتجَّ جوف الجوْ رعدْ
يا الضوْْْ كفرْْ ...
يا الضوْْْ كفرْْ ...
من بعدما نفد الصبُر .. والإحتمال في الجوف دَشَرْ
صنََّّ المطرْ .
والجوْ صِفا .. بنْقَرْ حجرْ بتْ الرسول .. لكِن بعدما الضوْ كفرْ
ضربتْ شعاعات الشمش في دوشة فوق قوز الرماد ..
.. كلبةْ مدينِة نِعِيجَتَا .. ديكا العجوزْ .. وكدِيس عماد ..
.. طيرةْ بقرْ .. ودِحِيش غريبْ .
شوف الظروفْ ؟!
دحَشكْ .. حمارتَكْ .. والضيوف !
قلعنْ يَحَفْتِنْ في الرماد ؟؟
وبالسكَّرْ ؟؟ العيشْ ؟؟ السماد ؟؟
الموية أوْلَى من العباد ؟؟؟؟
وبالفِيتَرِيتِة العِيشْ حُكُمْ ... الموية أوْلَى من البُكُمْ ؟
ومَلَصْ العِرِيرِقي ولباسُو .. ومصَّرِنْ .. ما غيَّرِن
خمْخَمْ عقابْ الكسرِة .. واللابْرِي القديمْ ..
من دندهوبو المنْتَكِلْ النيمة .. شال باقي الأكلْ
خمََّّ الرياح .. خمََّّ المطرْ .. خمََّّ الجراحْ ..
خمََّّ الدَبِيبْ في القُفّة .. مو جايب خبرْ
قصَّالُو فرعين منقة .. بالمِنْجَل هبرْ
حشْحشْ صَبايْطاً هِن صُفُر .. لكِن قُلاد
البدري لسه على الحصاد
في أرواحْ على قوز الرماد
يا الضوْ بقالِنْ أعزَّ زاد ,,, ونجاضو زاد .
وإنكابَسَنْ فوق وجبةْ الزمن الغريبْ ، كلبةْ مدينِة ... كديس عماد ..
يا الضوْْ دبيــــــــــــــــــــــب .؟.
وطيرةْ البقرْ .. في الجوْ تغيبْ ..
دلَّتْ من الكازُومْ
د
بـ
ـيـ
ـب
والضوْ يَصنْقِع والوررْ
يا رازِقْ الحيوان أخو
نختا ... وتصيــــــــب .
نتحدَّى كيدك .. يا بحرْ
نتحدَّى إيدك .. يا مطرْ
يا آفة .. يا ريح .. يا فِقَرْ
نتحدَّى بالصبرْ الجميلْ ... بأعمالنا ... بي طيرةْ البقرْ
وطيرةْ البقرْ ، في الجوْ تغيبْ
دلَّتْ من الكازومْ دبيـــــــــــــــــــــــــــــــــــــــــب .
وإنكاتلنْ في آخر التمُرْ
كلبةْ مدينِة ...نعيجّتا .. ديكا العجوز .. وكديس عماد .. حمارتو .. والدحشْ الغريب
ودِحِيشو فوق الرمادْ .
عَكْمْنا فينا من الغلِي ، وعِيشةْ الجلاجلْ والشتاتْ ؟..
وبالسكَّرْ .. العيش .. السمادْ
الموية أوْلَى من العباد ؟؟؟
وبالفِتَرِيتِي .. العيشْ .. حُكُمْ
الموية .. أوْلَى من البُكُم ؟؟؟؟؟
ولمَّـَّــَّــس دِحِيشُو ..
الضوْ بكى .
بكى ما بكى ؛؛؛
بكاّهو حِسْ الطائراتْ
بكَّاهُو قُدْرَتُو تنتهي ؛؛؛
بكَّاهُو يرجى المعجزات !!؟
بكَّاهُو قُولةْ الموية أخفَّ .. وأقلَّ من كمْ وأربعين
بكَّاهُو كضَّبْ حاســـَتُو .. وصدَّقْ أمير المؤمنينْ
بكَّاهُو ما رَمَى للكُرِيق ، زاغْ في أوائلْ النازحـينْ
مع إنُّو أدْنَى الناس شِتُول ، وأخفَّ سُكْنَة ، وأقلَّ طينْ
وإنضرَّ أكترْ منَّهُمْ .. لكِنُو .. ما ندمان .. يَمِينْ
بِيتُـــو اليَرُوحْ ..
عَفَشُو اليَرُوحْ ..
غنَمُو التَرُوحْ ..
ما طالَ عايِشْ .. وفِيهُو رُوحْ .. وأمُّونَة نفَدتْ بالعَوِينْ .
في اللُجَّة يفْضَل كالسَفِينْ .. أكْرمْ لُو من جرحْ النزوحْ .
ولمَّـَّـس دِحِيشُو .. الضوْ بكَى
بكَى ما بكَى
بكَّاهُو يرْجعْ لِي ورا
بكَّاهُو رادِي الدنْدَهُوبْ الغادِي
وأم دُرمان تغنِّي .. حبيبتي آه .. وودادي وين .. وحَبيبي وُوبْ !
والباقي كلُّو مقابلاتْ ..
ضِدْ القوانينْ البدِيلَة = مع القوانين البديلة
اليَسْوَى ما يسْوَى الرَزِيلة
جهنمْ .. الجنَّة .. الفَضِيلة
؟؟ .. ؟؟ .. .. ؟؟
ولا خَتَرْ في بالُنْ الحالْ الكَدَرْ
لا علَّمُنْ سِيلْ الجبالْ الشَاتْ مواريث القَبيلة مع الحجرْ
لا حِكمةْ البحرْ الكَسَرْ
ما ليهُو مُسْلِمْ لا الكَفَرْ
هَبَدْ الجوامع من طَرَفْ .. غَمَرْ الكنيسة مع الغَمرْ
ما علَّمُن
ما علَّمُنْ
والألَّمكْ . ما ألَّمُنْ
ما ألَّمُنْ .. ما ألَّمن
ضِدْ القَوانين الهَزيلة مع القوانين العديلة ، الماب تَمرْمِطْ للبِلاد .. اللابْ تَصنِّفْ للبشرْ .
والضوْ زَفَرْ
استغفر .. إنشهدْ .. تَلا
في سِرُّو سُورة الزلزلة ... دُونْ بِسْمِلة .
قاوم عَنَا .. نفَّضْ عِرِيرِقِي .. ودقرْ طاقيْتُو لي ورا .. وإنحنى
شدََّّ الحَبِلْ .. بالطُوفْ دَنَا
جَمْ تمْرَة مِن دُون التَمُرْ .. ماب تنْطَلِعْ .. طالت كُدُرْ .. يقَّن عفاها وسبَّله
سابْ الحِديَّات تَسكِنا
بمْبُونَة مِن كمْ وأربعين .. وحِّيدا ما خَلفتْ جَنَا
مِن جابا جدُّو من المَحَسْ .. من هي الصغيرِة محانِنَا
يسقيها بالجُوزْ ما فَترْ .. قَدْر اليَرَجِيها المطرْ .. والليلِة حظَّها طُوفَنا .
شرَّقْ .. بحرْ
غرَّبْ .. بحر
شـمَّل .. بحرْ
جنَّبْ .. بحر
د
نـ
ـقـ
ـرْ .. بـ حـ ـرْ
صنْقَعْ .. بـ ـكـ ـى .
بكَى ما بكَى
بكُّاهُو حِسْ الطائراتْ
بكَّاهُو قُدْرَتُو تنتهِي
يكَّاهُو يرْجَى المعجزاتْ
؟؟؟؟ .. ؟؟؟؟ .. !
وبآخِرْ نَفَسْ .. والحِيلْ كِمِلْ
بِي طُوفُو صدَّ الدنْدَهُوب .. بين الضَبابِينْ والنملْ
نامْ نُومةْ الدِيكْ في الحَبِلْ ....
صحَّاهُو آذان العَصُرْ .. يا الضوْ مَفوِّت كمْ وَكِتْ ؟
نـ ـقْـ ـنَـ ـقْ بَراهُو تِحِتْ تِحِتْ
رقْـ ـرقْ دموعُو بِقَتْ تَحِتْ
صلاَّيْ من القرآن غُنا
صلْ يا حمام قِدَّامي .. أنا .. غرقان لِي فِ أنجاسْ لِي هِنا
ما شال جداولنا البحر
شال مُسْتَراحاتنا وهَبَرْ
طفَّحْ زَفارات كم سنة
مِرحاتنا والكُوشْ القُدامْ ماصِن وَكِتْ ماصَ الهَنا
بـ إيه إغتسِلْ ؟
وإتوضأ بـ إيه ؟
غير الصَبُرْ ... يا ... ربَّنا ؟
بكّاهُو .. خَلَّ البال نَبلْ
قُولة .. عقابَكْ في الجبل ، من زيْ دِي بشْرَبْ يا جَنا ؟
هُونَق دِحِيشُو .. الضوْ بكى
بكى ما بكى
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين .. وحبيبي وُوب
والباقي كلُّو مقابلات ..
والنشرة .. مافي .. ولا خبرْ عن بلدُو .. عن شِدَّة عَناهو .. عن البحر
عن سر نَفي
ودِي الوكْتِ لندن ماب تبين ..
حالاً دَحِين .. زيْ حالُو .. فِي .
يا الضوْ
قَبُلْ غِيبةْ الشمشْ
قَبْل القَعُو .. قبْل البعوض .. قبْل الدَعَتْ
والمُويَة كُل ما لِيك تَزِيد .... والزَاد نَفَدَ
قَبْل الحِصـــار .. يا زُول أخير تَخَتَا البَلَدْ .
يا زُول قُعادكْ شِنْ يفِيدْ ؟?
شِنْ حارسُو شِنْ خائف عَلِيه ؟?
أكترْ من الطين الوقع في الطين شهيد ??؟
صُور التَمُرْ .. يا الضوْ .. أمِشْ
عِينْ الشَمِشْ .. يا الضوْ .. أمش
البُرْتُكان والمنْقَة والنِيمْ .. تِنْطَقِشْ .. يا الضوْ أمِشْ
الدنْدهُوبْ .. يا الضوْ .. أمِشْ
حَدَرن لُو من قوز الرماد .. رَمَن الرِمشْ .. قالن لُو أمش
قبْل الحصار .. يا الضوْ أمِشْ
نَبْيَ الله نُوح .. قال لكْ تَمِشْ
من ضو ترُوح .. يا الضوْ أمِشْ
يا زُول قٌعادكْ شِن بفِيد
شن حارسُو شِن خايف عليهْ ??
دكَّانك الغايةْ العَرِشْ !
دولابك !
العَفَشْ الجديد !
الحافلة !
بيبان الحديد !
تاوَلِيتكْ ! البايرَكسِ !
إيه خايف عليهْ !!
أكتر من الطين الوقع في الطين شهيد ؟?؟
داك الفَرِشْ ..
والعدِّة في السحَّارَة .. خُتْ فُوقَا البِرشْ
ومن ضو أمِشْ .
عارفين قليبك طبعُو حار
وبيَهِمَّك الروح مو القِرِشْ .. لاكين أمشْ
في الفيها ما عندك خِيار .. غـــــير ما تَمِشْ
إنسان معمَّرْ بالحياة
ما ترْمِي نفْسكْ يا حِمِشْ للتهْلُكَة .. خلِّينا أمِشْ
شِنْ حارسُو ؟
شن خايف عليهْ ؟
أكتر من الطين الوقع في الطين شهيد !؟
وملَّـَّـَّـس دِحِيشُو ..
الضوْ بكى .
بكى ما بكى
بكَّاهُو حسْ الطائرات
بكَّاهُو قُدْرَتُو تنْتَهِي
بكَّاهُو يرجَى المعجزات
بكَّاهُو يقْنَع بالرحيل
بكَّاهُو ما كان الشُدَرْ .. ما الطير .. وما كان النخيل
بكَّاهُو كِيفِنْ سَدْ شِبِرْ من مُويا يصْبِحْ مستحيل
بكَّاهُو يَلْوَطْ في البحرْ .. والغِيرُو يشربُو سلسبيل
بكَّا البِينضُمْ في الغَلطْ .. يا قالُو مُلحِد يا عميل
بكَّاهُو .. آه ..
ما هُو .. الإله
؟؟ .. ؟؟ ..
يا دَكَّةْ السُلْطَة
ودُخانا .. وشمْلَتا
وفي شرْعَك الإنسان يموت
إن زادت الموية ويموت من قِلَّتا
لو سامحك في حقُّو .. سِيدي .. العُمدة ..
هُــوي
تبْ ماب تسامحك بِتْ أبوي في شتْلَتا .
يا مَسَمِّي مِحْنَتنا :-
إمتحــــان !
مرَّات قَدَرْ !
حِيناً غضبْ !
!! ؟؟ !!
ناكِرْ جِبِيهاتنا .. وصلاةً صلَّتا .
يوم يمْحَق الصاح الخطا
وين ؟ تمشي من غضب الغلابة اللا بَكتْ لكْ نازِلاتَا .. ولا شَكتْ لكْ عِلَّتَا
لمْلِمْ خُرافاتكْ علِيكْ .
ما حرَّقتنا ضَرِبةْ إيديك .. بسْ روحنا حَقَركْ سلَّتَا
وبِنَجِيبَه ضرْبتْنَا .. وتَصِيب .. في حَزَّتَا
وفي حَزَّتَك .. يا بيتنا كَبْ
ويا بيت أمير المؤمنين إنت اِتْنَـكبْ .
والضوْ شَطَبْ جِيهةْ اليمين ..
حجَّاً ........ إلى ان آمنين
وبي خط خَلاَوِيهُو المَكعْوَجْ والحَرِفْ واضِح تَخِين
بي دمْ .. و .. طِين
الضوْ كتب فوق باب أمير المؤمنين
(ما ضرَّ بيتَ أبي لهبْ لوظلَّ بينَ المسلمينْ
لوْ جاء فينا لِما ذهب يا مؤمنينَ بغير دِينْ)
ومَضَى اِسمُو بين قوسين "غضب"
والمويَة أوْوْوْوْ .. أو كاللظَى
رَمت الدهاليز والأوض .. بسْ فضَّل الباب .. العِظَة ؟.؟
,, و ,, . ,,
.. الضو ..
.. ضِـ
ـحِـ
ـكْ ..
ساعةْ واداعُو .. بِقَت طَرَبْ
غنَّـَّـى وضَرَبْ .. بي طُوقُو عند ساعةْ العِشِي
بانتْ نِوِيرَاتْ العربْ .. حَزْنَانِة غَبْشِة مَدَعَّشِي
حِسْ الصُبَارْ في المُويَة .. والقّعُو .. والمِعُوزْ
طَرَّاهُو للديك العَجُوزْ .
يا الضوْ يجُوزْ ينْجَى .. ويَجُوز
"" الصَبَرَة كَمِيرْ كُوْ كَوْ تِنْعشَّى عَشَاهَا مِنْ ضَوْ
الصَبَرَة حَرَامِيَّة وأشوْ فِ حبال خاذوقة إتْلوْلوْ
لا ترمي دموعك شوْشوْ
قــاوِمْ والمـُرَّة بِتِحْلوْ
ترف إستخباراتُن أوْ صَاجْ الْدَبَّابَة الْ كـَرَرَوْ
ضَنَبْ الطيَّارَة الْفِي الجوْ
الْ ترْمِي قنابل بوْ بوْ
كم يبني بلادك يا الضو أوْ يحمِي وِلادك يا .. لو
الينضُمْ طوَّالِي يسوْ ""
والضوْ بكَى .. فُورَنْ وَشِي
من شُوقُو .. واللاَّ من العذاب الفوقُو ..
ولاَّ من التَعَبْ غالبُو المشِي
وكلْ فرْدِة جَارَّهَا من بَلَدْ .
- : - يا الضوْْْ .. سلامتك .. جِئت مِتِينْ
سِبْتُوهَا وحَّدّا للبعُوضْ .. للطير .. ودبَّايْ البحرْ
نُونِي الضَبابِين .. الكلابْ .. الجِنْدبْ .. الفار .. السَعَرْ
.. للجِنْ .. يَلَبِّشَه .. للدَعَتْ .
يا الضوْ .. بلدنا .. وودَّعَت
راحتْ شتُول ، دُوب فدَّعت
فِطْسَت بيوت ، ما ضاقت الزِينْ والعَدِيل ما اتمتَّعت
ضاعت سعايات إنْسَعت
يا الضو تَليِّسُو بالقُفَاف ، آخر المطاف ، شمْلَةْ كِنِيشْ اِتوسَّعت
حِلْتنَا غِرْقَت ، ومن طَرَفْ
حلتنا غرقت ، وفي شِبِر !!؟
غَرَّقْنَا يا الضو صِح سَرَف ؟؟
العلمتنا العُوم .. تقُوم تَغرَق هِي .. ما تقْدَرْ تعُوم ؟!؟ يا للأسَف .
عزَّ المَصاب ..
البَرَكَة يا الضوْ في الرُقاب
إلاّ الرقاب إنُجهْجَتْ
ما جاتا راحةً من كُتُرْ ما انْجيْهَتْ ، ما دام معلَّقَة في التراب .
صَنَّت ..
شِويْتِين .. نَهْنَهَتْ
خايْفَاك يَهَقِلَكْ السرابْ .. يا الضوْ يَهَقِّلْنا السراب
واِنأوَّهَتْ .
والضوْ صنم ، ما جاب جواب
لا ذاتَه هِي اِسْتَنَّت جواب .
_:_
أمُّونَة وِينَا ؟؟ مع العَوِين في المدرسة
أمِّك مَنصَّحَة حالة زين ؟؟ في المدرسة
خالْتِي الزِلال ؟؟ في المدرسة
جِدِّك حسين ؟؟ في المدرسة
السُكْنَة كيف ؟؟ في المدرسة
العِيشِة كيف ؟؟
- تسْعَل سُعال .. يا الضوْ تقول تامْ لَكْ سَنِي
تسعل تقول .. ماك .. من هِني
شِنْ السؤالات ينفعُوا
ما حال غلابة علي غلابة إنْفَرْزَعُوا
فتَحُولُن الغُبُشْ .. القلوب .. قبْل البيوت
قَسَمُوا القِليْلِي معا بَعَضْ .. كم طمَّنُونا وشدَّعُوا
لكِن دَوام الحال محال ..
وعلى العموم .. ما مرَّ يوم .. ما جاب هموم
هَمَلِي ونِقاراً تسْمَعُوا .....
واحدين يقُولُوا لك خلاس .. واحدين مُصِرِّين يرْجَعُوا
وإن جئت بلدنا مُطَمِّنَة
بَسْ .. كيف .. يا أخَيِّي نأمِّنَه - قبل البحر - من ها الفِقَرْ
فِقَراً ضُعُفْنَا مَسَمِّنَا
ال في العروق دا مُو دمِّهُن ..
دمَّك .. يا أخيِّي ..
ودمِّي أنا .
الَنَار تَقِيْد فِى الَكَان سَبَب
يَا الَضّو بِيُوتَنَا يَوقِعُو
اللّه يَجَازِى الَكَان سَبَب .. يَا الَضّو بِيُوْتَنَا يَوَقِعُو
نَهَجِر بَلَدَنَا نَزِح هِنا
كان سُلْطَة ينْسلّط عَلِيها .. أكَّان لِجانَّا يلجِّنا .
وبِي تُوب وَكِت نَزَحَتْ حِرِقْ
قشَّتْ وَشِيها من الأسَى .. ومسَحتْ وَشِي الضو العِرِقْ ..
عَصَرَتْ علِي طَرَف الطَرِيق .. عَقَدَتْ سِفِنْجَتَه بي دِلِقْ
وكُلْ فَرْدِة كانت من بلد ، ويِنْشَافَنْ الإتْنِينْ خَضُرْ ..
اللِيل سُتُرْ ... الليل سُتُرْ .
سَرَحَتْ مع الخاطِر بَعِيد .. عَكْسَ العِرِقْ
شِيمْةَ التَهاوِيم شالَتَا
نِحْنَ وقَدَرْنا قَدُرْ قَدُرْ ..
نَصْبُرْ صَبُرْ
نصبر على البُوخْ الغَريبْ ..
نِسْتحْمَلْ أصوات القَعُو
لامِن نلاقي الهَمْبَرِيبْ ..
والليل غَناوِي نَوَلِّعُو
يا يُمَّة تَفْرَحِي من طَرَفْ .. عاد .. والمسافرين يرجعو
دَه كأنُّو لا دمع إنزَرَف .. لا خيوط قلوب إنقطَّعُوا
لا شتلة لا محْصُول تلَف ..لا ناس بيوتن وقَّعُوا
بحراُ بَلا الخازُوق زَحَف .. نبْنِيلُو قِيف ما يطلَعو
صُدْفَتْنا تبقى آخر الصُدَف .. نمْسِك زَمنَّا نَطوِّعوا
يخَتُونا يمشوا يَوَدِعُوا .. فِقَراً علينا إتْرَبْعُوا
ديل لاب يخافوا من الحساب .. لاب يختشوا ولاب يشبعوا
حقَّاً نحرسو ولاب يجِي .. حقك تلاوِي وتقْلَعو
أمْسِك شُباطين الصراع .. الماب تحصِّلُوا فلِّعُو
ثبِّت لي بالك لا يلين .. أنْقَحْ ترابك وازرعو
عُقْبان أبو الإنسان حنين .. ما شقَّ حَنَكاَ ضيَّعُو
سَرَحت مع الخاطر بعيد ..
عَكْسَ العِرق شِيمةَ التهاويم شالَتَا
دَقَشَتْ طَرَف قوز الرماد إنتَرْ تَعتْ ..
كادَن عيونا يَوِقِّعُوا
رجَفَتْ ..
صِحَت بي حالَتا
صدَّابَا تيَّار البحرْ .. كان أقوى من بالَه النّزَف
وكان فرحةْ الناس === الأسَفْ
الهمبريب === البوخ
غِــنِيوَاتَه === القعو
صنَّت بِنيْةً جَنْفِي هيل بِت السَرَفْ
جمْ كُوم وِلاداً يقْطَعُوا
فوق البحر .. فوق اللجان التاني جاتْ
فوق الفِرَج والبشْتَنَة
الحالة ما دارت بَحِت .. الحالة ظاهْرَة وبيِّنَة
السُلْطَة عن غرق البلاد مسئولة هِي ..
وفوق عِينَا حقَّنا تدْفَعُوا..
- وبلدك حِمايته مُمْكِنَة
_ أصْلُو اِحْنا لازمنا امتداد .. قُبَّال بيوتنا يوقِّعُوا
-كُنَّا بنقوله وتلْكِنَا ..
_ حيكومة دايْرَة تَلَجِنَا .. تدِّينا مشروع نزرعو .. تدِّينا جِيهةً نسْكِنَه
- لوْ وقْفُوا الحرب الحرام الْ الله ذاتُو هُو لاعِنَا
- كان البلاد إنطامَنَت .. كان ألْفِ خزَّان اِنبَنَى
_ يكْفِينا ذِلَّة ومسْكَنَة ,, كانت زمان السرقة دسْ .. الليلِة عِينك مُعْلَنة
_ وفِرجاً قِبيلْ بِنَشوفه عِيب .. عينك عِيان ومَقَنَنَة
- باسْمَ الرَصيف والمارصيف .. كم بيت وصالون اِنبَنَى
_ كانت شعاراتُن وعود صارت مُجرْد عَلْقَنَة
- وبين الدقون والدلْقَنَة .. كل التقول موساك تقوم تلقاهو ربَّ الفرْعَنَة ..
_ والجايِي أعتى من اللِي فات
- الجايِي أعتى من اللي فات
والضو تَنَى ..
عضَّ اصْبَعُو
عضَّابو حِسْ الطائرات
عضَّابُو قُدْرَتُو تنتهي .. عضابو يرجى المعجزات
عضابو صبْرُو وطول رَجَــــــا
.. وَيْْ .. أبونا جـا
.. ويْ .. يال القِمِيرا .. أبونا جَـا
وجرُوا كالفراشات شُفْعُو
جروا منُّو غادي وفلَّعُوا
أدُّوا البحر .. أدُّوا الحجار ..
ساعةَ الحَضانْقُول يجْدَعُوا .. برَّاقْ عيونُن يشْلَعُوا
تالا القميرا يصنْقِعُوا ...
يا الطالع الشجرة جيب ليْ معاك خِيمة
تســتُرْ من المطرة إن كبَّــت الغــــيمة
************
جيب لك معاك قمحات
قمحاتنا في الشيمة
وغنم الحَلِب رايحــــات
ضـلَّمْنــَا ضِـلِّيمة
************
- خيمة الشحودية دَفُو مــاب تَدَفِيكا
ولبن اليهـــودية بلــدك ينسّـــــِيكا
قمحاً من امريكا خاذوق رِكب فيكا
غير خير بواديكا مـافـــــي اليكفِّيكا
************
يا طــالع الشجـــــــرة من خيمتك التوبة
جيب لك فروع خضرا أو جافَّــــــة يادوبة
في الحرَّة في المطـــــــرة في عِزْ بَرِدْ طــــوبة
نمْرُق مـن الوَكَـــــــرة وتبْقالنا .. راكوبة
)))))))))))))))))
يا طالع الشـــجرة قبِّل على الحِلَّة
قول ليها يوم بكرة كُـرْبتْنا تِنْحلَّه
ننزِل نضـــــوِّيكي ضِرْعاتنا مادِلَّة
قادرين نســـوِّيكي عُقْبان عَلِي الله
))))))))))))))))
يا طالع الشجرة
طوْلنا يا والله
أنزل هيا ويلاَّ
إندلَّى نِنْدلَّى
نِنْدلَّى حلتنا
حلتنا مادِلَّة
))))))))))
نندلَّى ما دام الأسف ، والجهجات ماب ينفعُو
ثبِّت يَقِينك ،، يا ولد .. الناس مصيرُن يرجعُو
ما شال عزيمتنا الهوا
والبنْدِقْ المربوط سوَى .. مافي أيِّ ريح بتفرْزِعُو
إنت وأنا ..
نار السعق كان ولَّعت بيناتنا ما تِسْتهْوَنا
الجوْ شرارة تَوَلِعُو
الزول بَحِنْ ..
حِنّ يا ولد ..
حِناً يقَدِمَك أتْبعُو
وتِشْ عينو دجَّال الضلال
قبَّال يَمِدَ لك أصْبَعو
حِنّ .. يا .. ولدْ
والضو يقالد من طَرَفْ .. ناس البلد قبَّال يقالْدُو يَدمِّعو
دمع السواد الانزرف .. لوْ الدموع بِيَرَجِعُو
في عَمَّة .. في بِتْ .. في ولَدْ
شمََّّ البلدْ .
ناضَمْ قبيلتو ووانَسا
هبْهَبْ دموعُن ويبَّسا
نقْنَاق حِبَيْبِين القَسا
طرَّاهُو حِس الطائرات
والضو نِسى
قوز الرماد ، والفوقو ، فوق قوز الأسى
الْفي المدرسة .
- شُفْنَا .. أيِِّّ شِي .. وما شُفْنَا شِي
مِعْزَاتنا كَدَّن للحصى .. شُفَّعنا بيَّتُوا للقَوَى
وجع البطون ..
درن العيون ..
الهلْوَسَة
موية الغنم والدود ، وموية الناس سَوَا
المستراحات === الخَلاَ
الله يجازي الكان سبب . . ما نلْقَى عافِي ولا دَوَا
ما نلْقى غير النسْنَسَة .. وكاوِيقْ كلام شالو الهَوَا
حال .. ماها حال
وقْعَتْنا تبقى على الجبال .
غلُّوا البضاعة .. العِنْدُو سِلعِة عِرفْ لها
غلُّوا القمح
غلُّوا اللحم
غلُّوا الخَدار
حتَّى .. الملح !
دسُّوا اللبن
دسُّوا العَدس والصلصة
دسُّوا الإسبرين ..
دسُّوا المعايش كلَّها
_ حاكومة وين .. واللجنة وين .. في عديلة راكْبَة محلَّها
اللجنة حلَّيتا .. المصيبة الجامْدّة شِنْ بِيَحِلَّها ؟؟
حال .. ماها حال
وقْعَتْنا تبقى على العدو .. الفيها تبقى على الجبال
قَدَرْ الله .. يا بِت الحلال
لع .. يا العَشِي .. قَدَرْ الرجال .. اللابْ تخاف الله وتتوب لابْ تِخْتَشِي
وأنا لجْنَة غرَّقت البلد .. أرجع وأجيك بي يات وشِي ؟؟!!؟؟
_وغلاَّ البضاعة .. الْفِي إيدُو مفتاح البضاعة ..
الأرزقي المايِصْ عَرَقْنا ومِتْحشِي ..
وما ضرَّ غير أبَّان دقون فيها الضلالة معشْعِشِي
وفِقَراً تَغُشْ في الله .. تخُشْ بيتو وتسرْقُوا ورا العِشي
كُرْ .. من ضمير ناس .. هان قَدُرْ .. تجْلِب بِلاده وتِتْرَشِي
كُرْ .. من عَوَارْضِك يا بلدنا .. الناس تَشُوف ومَدَعْمِشِي
تسمع سماع .. ومَطَنِّشِي !!
وحاكْمَانا في اشنو .. وشان شِنُو ؟
حاكُومة ما خابْرالنا شِي ؟!؟
حِسْ أمَّها المَهَرِيِة همْ ، يجي من بعيد
يا أمُّونَة بتِّي شِن الشَكِي
ما حاشُو في الطين الرُخُسْ .. ينحاش فِ أرْضِ مَكَرِكِي
حَرْمان عليكي تقولي لا
مجبورة يا خادْمَ الفَكِي .. مجْبُورة إنتِي على الصلاة
لا تأذِي جرحو تحَكْحِكِي
وجاييك مَلَكْلَك من تِحتْ .. يا أمّونة تاني تَلَكْلِكِي
شيلي الحَرف داك رشْرِشِي
قوم يا عشاي .. قوم للعَشي
قوم .. واِنتَكِي
وقام واِنتَكَى
ويلقى الحسن في صفْحَتو وقِدَّامْ وَشِي
- إن جيت بلدنا إنكسِّرت
_ أيِِّّ .. آ .. الحسن
- كَسَرَا البحر ؟
_ أيِِّّ .. آ .. الحسن
- يابا البحر دا .. بحرْ بلدنا ؟
_ أيِِّّ .. آ .. الحسن
- الزول يكسِّر بلدو ؟؟
والضو .. سكَتْ .. طقْطَق أصابِع ولدو
.... فِسْْ .. إنجِلِسْ
... فِسْْ .. إنجِلِسْ
- يابا المدارس اندمَّرت ؟؟ صاح والجوامع اِنكسَّرت ؟؟
_ أيِِّّ .. آ .. الحسن
- يابا .. الجوامع .. هيل مِنُو ؟
_ هِيل الله .. نُــوم ..
- حتَّى المدارس حقَّتُو ؟؟
_ لا لا الْلتْ الحاكومة .. نوم ..
- هُو الزول يكسِّر حقُّو كيف ؟؟ !!؟؟
والضو يَطَلْوِحْ بُو اِندهاشْ .. ما يلقى قيف
.. لا بان لُو .. بَرْ .
وأمُّونَة صُوتا من البعيد ..
نوم .. يا .. قَشَرْ
- صِحْ يابا في الجامع ، جا تمساح واِنبَطَحْ ؟؟
_ أيِِّّ .. آ .. الحسن
- يابا التماسيح .. مسلمين ؟
_ لا مجرمين
- لابسين دقون .. لافِّين طِرحْ ؟؟
_ ..........
- ما تَضْرَبُوهُن بالسلاحْ ، وتَكَتِلُوهُن .. تاحْ .. تَرَحْ ؟
والضوْ .. سرحْ
وأمُّونة صوته من البعيد .. حَلِقَه إنجَرَحْ
: نوم يا قَشَرْ .. : نوم قبْل أجيك
- يابا البحر دا ولَدْ مِنو ؟
_ ولد المطر
- ويابا المطر ؟
_ بت السحاب
- ويابا السحاب ؟
_ خير للبشر
- ويابا البشر ؟
_ هُول ربَّنا
- ونان ربـ
وأمُّونة تجري من البعيد ..يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو .. جيب القَشَر دا علي رفاقتو نرَقِدُو
أمُّونة هَزَّتَا تمْغِسُو
- أنا دايْر أنوم في صدر أبوي .. شان البحر
وقام إنحشر .. في صدر أبوهُو وحدَّثُو :-
في مرَّة جُونا .. رجال كبار .. كبآر
غَمَتُولِي في إيدِي .. قروش كتار .. كتآر
أمُّونة شالتا فنَّتا..
الراجِل أبْ دِقناً كبير .. سبَّاله دنْقَر لقَّطَا
وأنا قُم بكيت
أمُّونة فكَّت صُرَّتَا .. وأدتني صندوق بسكَوِيت
_ بعدين ؟
- سكَتّ .. وأمُّونة قامت .. شَوّ .. بَكَت
وتلْفَح نعالَه .. وتَفْلَعُو ..
نوم .. يا .. قَشَرْ
نوم .. قَبْلَ أجيك
- أنا داير أنوم في صدر أبوي .. شان البحر
وقام إنحشَرْ .. في صدرَ أبو
ونام الحسنْ .. في آخر المسا
وصنَّت عيون النوم يجيها بعد تعَبْ ..
سرْسارو داخل المدرسة .
والضو غَمَد
صِحَى .. بِي صياح الأمهات .. وأطفالَه مِنطلْقِين بِكِي
كل فردِة تبكِي على بلد
بكَّاهَا حِسْ الطائرات .
والضو .. ضحك ..
لمَّا البنات قالَن لُو طُقَّهَا بِي حَجَرْ !
يا الضو تَطُقَّهَا بي حجرْ .. في الجو ..
تَرمِّي لنا الخِيام ..
يا قطْرَِةَ التَرَاكُومَا ..
يا سكَّرْ .. دقيق .. ومعلبات .
ومنام .. منام
جات البلد .. تَعَتِبْ .. جراحَه مَسَبَبات
لون القمح ..
طعم التُمُرْ ..
ريحةَ الطَلِحْ ..
ضُل البرندات القُدام
البُرتُكان .. والمنقة .. والليمون
يجوهو .. منام .. منام
طُورِيْتُو .. فِطْنَ الكونْشِبِر .. مرْكُوزة تالا السام
تجيهو .. منام .. منام
المُشْرَع .. البنْطُون معَدِّي .. ودوْشَةَ العمال .. تجيهو .. منام .. منام
الروضة والأطفال .. بنات الإبتدائي .. العام .. تجيهو .. منام .. منام
الشارع الوسطاني .. والزاوية .. الَسَلام والناسْ ..
يجوهو .. منام .. منام
الصَفْقَة .. والطنْبُور .. ووِزَّاً عام .. يجيهو .. منام .. منام
الناس تقاومْ في البحرْ .. مرْيُوقَة .. مِتْماسكِين تمام ..
في القيف يجوهو منام .. منام
الأرْزَقِي أرباب البنوك .. شُلَّةْ حَرامِيْةَ الضلام
المُلُّسْ .. السادة الكرام .. لافِّين عليهُن زيْ غَفَر .. قاشْرِين
يجوهو طُمام .. طُمام
السُوق .. غَلاها .. الشُفَّع الأيتام ..
يجوهو .. دِيوش .. دِيوش ..
وبلا قروش .
اللجنة .. تجَّار الرصيف .. المسْخَرة .. الهدَّام ..
يجوهو .. كروش .. كروش
والضو يدُوش !
أصبح صباحِك .. يا البلد
واللاَّ العَفاريت أصبحت
يصْبِحْ صباحِك يا البلد
تَبْرِي وجرحْ بالك برد ..
والضو يعافِر في الجبل
مرُّوا بُو سابع يوم وِلاد
يا الضو حمارْتكْ .. طفَّحَت
أمِس الكلاب بَعَجَنَّهَا
كلبةْ مدينِة .. وديكا .. عِيك .
دحشك .. معاهُو دحيش غريب
خلِّينا فوق قوز الرماد
أدِّينا عيش وصبيط تَمُرْ .. يبقالو زاد
إسبوع يعيش كان الله اراد
أنا بُكْرَة صادْ .. كان الله راد
والضو خنس .. قنَّب حكَى
حكَى للوِلاد قصَّة تساب كم واربعين
حكَى بي مَغَسْ ..
كيف جِدُّو فات الدنيا .. فاكر الإنجليز ضربُوا البحر بالطائرات
شان يشْرَق المشروع يموت والأمَّة تنْشَتت .. شتات
قال وإنتكَى ..
" الإنجليز أذنابَه في .. وكم وأربعين مويات وجات"
صنَّة و بكى
بكى ما بكى
بكَّاهُو حِسْ الطائرات
بكَّاهُو قُدْرَتُو تنتهي
بكَّاهُو يرْجَى المعجزات

كتمه ومطر
أملي قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش ..
بالجنود الوين تخش ؟؟
في سبيلك كالنهارْ
بالمداد الما بيغُش ..

بي وتر جاء من الجحيمْ
أملي قلبك بالنسيمْ
ملِّي بالطير الرطنْ
طالما العالم قديم ...
ينكسر ريح ... المحنْ
خلِّي بالِك مستقيم
دغري وإن مال الزمنْ
راحل الليل البهيم
والبصيرات ما عِمَنْ
الظروف الليلي أبن ...
روقي لا خوف لا حزنْ
باكر التِّقْيات تنورق ... وتنملي الضرعات لبنْ
أبقي زي ما هي القماري .. ما بتدور عن سكنْ
ببصاره تلد صغاره .. لا مضادات لا حقنْ
لا قياصر لا طواريء .. وعمره حسها ما انسجنْ




يا هشاب كل الحنين ... كلما طقّاهو همْ
لا في آهة ولا أنين ... لا بيروع ليحو دمْ
من مرارات السنين .... من عصارات الألمْ
بيمرق الشوق الدفين .. بي كعنكيل العشمْ

احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ !!!
والمراحات قاطي قطْ
فجأة في قلب السماء ...
غيمة
غيمتين ..
غيم ربطْ

كتمة حتى الطين عِرِقْ
والشجر قرّب يَبِقْ
إلا يا طيبة الخَلِقْ ...
من بدل تفرح تَنِقْ
الشِّكايات ...و السّخَطْ ..
لا السِّحاب داير يَصُبْ
لا الهبوب دارت تَهُبْ
نسمة نسمة آ رب نقط
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ

كتمة كتمة معاها ضيقة
نسمة يا رب الخليقة
سكت الأطفال دقيقة

نبكي خُشّع .. حول في حول ...
ظاهر الحال ماهو مخفي .......
وفالنا فيك ما فيهو قول
يا المبرِّد والمدفِّي ..
نسمة يا رب الفصولْ
نسمة كل راس ساعة تكفي .......
نسمة واحدة لألفِ زولْ

ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ...
لا ده لا ده ولا فَرِقْ
طيبة تمِّي الحكوة قولي
الصّبرُ خلقوهو هولي
ده الزمن يقسى ويَرِقْ ..
وانتي يا كتمه تطولي
اليطول بال الخلق ..
طَرِّقْ الغنوات يا زولي
وتم نشيدك في الحلقْ
عدّ فات الريح شَرِقْ
من بعد جاب السِّحاب
من بعد قشّ التراب ...
مشّط القش والشجرْ
رجّع الطير للوكرْ
ها البرق شال البرق ..
الرعد ريحة الدعاش
عاش بريق القبلي عاشْ
ابشروا بالخير نقطت
أي والله المطر

سوقني معاك يالحمام
سوقني معاك يالحمام
سوقني معاك يالحمام

... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

تفاصيل ما حدث

سكتّ
نَضَمْ غُناي .. ورّاكْ ..
بَدابِكْ باتّكالي عليكْ
خَتَمْ بِكْ .. بي هروبي إليكْ
وكيف طفّرتَ صقر الآفة ..
ما يلفحْ .. جناياً ليكْ
ولا يدخل مجال عُشّاً ..
نسجتي حنانو فوق إيديكْ
وكيف كُوترتَ ريح الآهة ..
ما يقرب فرح عينيكْ

وراء جبل الصّبر .. فضّيتو
والمطر الِحرِد .. رضّيتو
سُقتو على البلد ورّيتو ..
ما لمّابا ..
لمّا بياّ ...
لمّا بيكْ
......
......
......
هادي الحُفرة .. كانت بير ..
وكان منكابي فوقا حَرازْ
وتحتو الصخرة كانت حوض ..
وكانت للقبيلي ملاذْ
كانت مُلتقى العِربانْ ..
وكانت مُتّكا الِحبّانْ
مركز دورة الإنسانْ
مِنّها هبّة الفرسانْ ..
وعندها رَبّة العِرسانْ

وكم شِهدت غَرام وغَرامْ
وحِفْضَتْ كم كلام وكلامْ
تعكّر حين خصام وملامْ
تروّق حين وئام وسلامْ

تراشق أعين الأطفالْ ..
تراهِقْ للعصافير يوتْ
ترشرِشْ لي تياب بنّوتْ
جنّها من أعزّ بيوتْ
لا رَفعتْ عليهِن سوط ..
ولا رَفَعَنْ عليها الصّوتْ
حين تملا القِرَبْ ..
تِنْمَنّى ..
تدّها صَنّة ...
حتى تفوتْ
تسوِّي الصّجْ ..
تَلِمْ الطّورْ
مديح الحجْ ..
غُنا الطّنبورْ
تضيق / تحتجْ / .. تقيف طابورْ
هنا الشُّفع .. يمينَك دورْ
هنا المارشات .. هنا الدّستورْ
هنا اللِّبّيشْ
(قريش يا قريش ،
حبابو قريش ،
نزل ملك الحبش والدّيش)

تدور ..... وتدورْ
قواها .... تخورْ
تلم أنفاسا زي عصفور
وتِنَفّضْ ... تمش بالدور

بشيش وبشيش ..
تشاقِقْ بين تقانتْ العيشْ
وبرسيماً .. سمِح مفروضْ
وما تهبش دوابا قشيشْ
بِنيّات الغُبُش شقّيشْ ؟؟؟؟
تودّي ...
تجيب ..
مع الدّوبيتْ
تِنْضَكّرْ خِدِمْة البيت ..
مشى الواقود .. في كل عصير
لُقا المريود .. بدور بِدّيرْ
من اللخّير.. تخاف ، وتخاف ..
تخُب السّير
عشان في كلام وراهو كتير
عشان باكر ، تعود وبخير
(عويش في عويش ..
بنالو عشيش ..
حِدَيْ وجناهو ربّى الرِّيشْ
جناحو هبيش ..
تملِّي ينيشْ ..
طفش قُمرِينا طار شقّيشْ)
؟؟؟؟ ؟؟؟؟؟ ؟؟؟؟؟
....................
مطر
يا
خير .....
ورا طرف الُحقاب كان روض ..
وكان بيناتو خاوي غديرْ
وكل الصحرا كانت غابة ....
بي شُدرا الكتير وغزيرْ
صباح وهجير ..
يهبهب ... ناز
حلاته !!! وفرفرات الطير ....
وقت يغشاها - مرة - رذاذْ
قطيع غزلان ..
نعام وأسود ..
سعية الله ، تخوجل ، في مراعي السود
بلود وبلود ،، دليبن رازْ
مَترَْ ،
مد البصر جنّات خُدر، رباها تور الساقي
حرقت
حين جاء بابور جازْ
............ ؟؟؟؟؟؟
(دغيش في دغيش
حصدنا العيش ..
طلعنا مطالبين الخيش)
؟؟؟؟؟؟
والبتشوفو من أطلال ..
دي كانت ذات وطن حَلاّلْ
بيوت ناساً كُرام وعُزاز ..
سوا سوا في رخا واملاق
منطقوا لوعة الإخفاق ..
ـ قدر ما ظنّو في الجايين ـ .. تمطّقو روعة الإنجازْ


( حويش في حويش ..
سكنّا الدّيشْ ..
أوضنا بقت نقاط تفتيشْ)
؟؟؟؟؟؟
هادي المملكة المحروقة ..
كانت جيهة
وكنا نجيها
مستشفانا .. كم كفانا ..
منو نطيب
ويتوفانا
كانت نادي ...
كانت ورشة / بوسطة ألّتنا / كانت مدرسة وقبلتنا
لي حِلّتنا كانت سُوقا
لا وقعت صواقع فوقا
لا غضب الله شلّ عروقا
ما من حرب قامت فيها ..
لا سَقَطَنْ قنابل وغازْ
(كريش في كريش ..
سِعِرْ درويش،
دوانا ، علمنا باتْ مافيش)
؟؟؟؟؟؟؟
كُنّا وكُنّا .. ياما عُزازْ
ولحظات التّلاقى لُذاذْ
هِلِكْنا وكِتْ وِكِرْ تورنا ..
ودهتنا بصيرة الإنقاذْ
هويّتنا إتلغتْ فينا .. بقينا اعجازْ
زمن خاوي
وحقيقتو مجازْ
(بشيشي ، بشيش
غلبنا نعيش ،
قبض والي البلد بقشيش)
؟؟؟؟؟؟؟؟
في الزّول الخَرَبْ لي بيتو
غالطني المطر .... هَدّيتو
لاواني الفراغ .... لاويتو
وكان أقوى الفراغ ما لاي
شَهّدتَ البرق .. مَضّيتو
نشّن قوس قُزحْ ... تالاي
اندرقتّ باللاّشيء ..
وبالمافي اتحويت في قفاي
وقعتَ وراي ..
رفعني يقين .. وَقَفْ فوق راي
بأنو الحال مغيّر زين ..
مغيرّ كان قِصِرْ كان طالْ
وإنو الأرضِ للكادحين ...
ومفتاح الحياة العُمّالْ
رَكَزْتَ على غناوي الفالْ ..
لساني سنين .. وحاضر بالْ
فنّا لي التعب .. موّالْ
شهرت على المناحة غُناي
فزع صبر الغلابة معاي
وكِتْ ناديتو
كيد الكايدين ردّيتو
خاواني المطر .. خاويتو
وفوق ضهر الهوا .. الشدّيتو
سُقتو من الخراب .. ودّيتو
لي تالا العمار وانصاب
فما كان العمار قدامو ..
غير قَلَبَاتْ حلمنا الخابْ
وصنّ يباب .. رهاب ورهاب
؟؟؟؟؟ ؟؟؟؟؟ ؟؟؟؟
شال نفسو المطر .. ختّاهو زي ممكونْ
خَنَسْ ..
لحظة خنس قُتْ مات ..
رفس تَوّر بخاراً باظْ
رطن بي كل لُغات الكون ..
وبوّخ ..
دوّخ الألفاظْ
كيفن كان .. وكيف حا يكون ..
تافقني الغُلُب حين قالْ :
(هرطتو ونمتو .. قمتو اعجاز
إنورطتو
يوم فرطتو في ماريل بنية الماظْ
ترباة عِزّها التاريخ .. ضُراع الكُدّح الأفذاذ
حبيبة جملة الشهداء .. الصِّح الإعجاز)
؟؟؟؟؟ ؟؟؟؟؟
قال قولو المطر ..
وانعدى فوقي بخار
ركضـ .......ـت وراهو حتى النّارْ
وانـ ترتعـ ت بين التّار .. و ... بين الشارع الما ثَارْ
وسدّ قصاد عيوني شِعارْ
رافعاتنو في إصرارْ ..
جماعات الهواء الأشجارْ
بنات الواطة والأنهار
خيوط العنكبوت .. وحمامة خَبّو الصاحبين في الغار
رافعاتنو حتى الشوق
وقع من فوق ...
وجاهِن تار
صرخت .. فركت للأشجار
في الأنهار نفخت النار بالهواء .. يا جماعة الغار ..
اعصروا على بعض ساريتنا لا تنهار
نشد الحيل ..
نعد الخيل ..
نسن الصارم البَتّارْ
وكلها كمّها الربّاطة .. بي لُقاطا واحنا كتارْ ؟؟
صفاً واحداً كالنيل .. وقلباً حارْ
نضاري الواطة بالضرعات .. من الزمن الكركي الضّارْ
وهاكُن شتِّتُوني بِذارْ
صرخت .. صرخت .. حتى النار
كشحت على الطناش مسدار
أجابني الصّي ..
وأبو التي تي ..
كلاب رمل الهجير الحارْ
وبديت احتارْ
انا نمل المهل قد ضاق ؟؟..
أم ارضة وجرّبت حُجّارْ
بديت احتار .. وقام فيني الجرح تاوارْ
رجـ فـ ـت
نزفـ ....ـت ..
صادني .... دوار
قضفتَ ..... حشاي ..
جرت بطني .. ووقعت جنازْ
تحت صوت الصّنين الرّازْ
بقيت بين الأرض والغيم .. والدّم الجمد والغازْ
مطفِّح زي هُتاف مهزوم ..
مطلوح طوف نجاتو الضيم
جبدت جنازتي للحجرة ..و وقدتها نارْ
لمحت وراء دخانا غُبَارْ
خيول كاكية تنخابت ..
يكون من تاني دفتردارْ ؟؟؟؟؟
طريت تاريخي في لحظة ..
ونسيت ما طريت ..
وفي طيف بيت دُمى وأصنامْ
تكلت جبيني تالا السّامْ
جَعَرْتَ شديد ، وبين أخرامْ
حشرتَ الفاتو والقدام
لويت آهاتي عِمّة عيد ،
شتمني حجر وطيتو قصيدْ
رجمني فتر ، توارى بعيدْ
ظهر لي كجر ، لقاني شهيدْ

طياب الواقع المسروق ،،
يطلبج لا غِرِق لا عامْ
الليل يا تباب الشوق ،،
على تقروقة الأنغامْ
نهار العاشق المحروق على دلجة شتا الأيامْ
هرست مراية الأحلامْ
وبي ساسويي ... فكيت راسي من قدامْ
لقيتو ضلامْ
لقيت ذاكرتي معطوبة ومعضّي كلامْ
مفوتة في انفلاتة سلامْ
خواخي الكتمة غاماها
صدى الأيام معمّاها
خطوط النسمة مشطوبة
ومدارا .... حُطامْ
خُفْتَ من الفصام .. قوّامْ
قفلت دماغي واستلقيت على طوبة
ورجالة غفيتْ
نجيت من سُهْدِ كمّين عامْ
باعجوبة .. ؟؟
غشاني منامْ

في أول دفرة في الأحلام
حلمت ..
جمعت في راس خيتْ
حلمت ..
حلمت إني صحيتْ
حلمت صحيتْ

( وطن منضوم بلا حظرِ وطواريء أحوم )
أتَكْرِنْ بالخبر لفّيت .. شوارع المدهشة الخرطوم
نطحت من الفرح للطابية .. طِرْتَ
دمـ ..........ـوم
وفَتْ .. فتّحتَ وانشلوحتَ ..
عِن جفلة حمار النّوم .. على الحصحاصْ
شهق بي احساسْ
حماس من كل جيهة حماسْ
وما من راس ..... فجيعة النّاسْ
وانا الرّاس الفجيعتو النّاسْ
بكيت وبكيت
نخجت براي ..
بُكاي قلب الغضب تبكيت
إتلفت غادي ... وجاي
تبنت أساي
في الوضع الحطب لا فاس .... معاي لا قشة من كبريت !!!
ولا من يرفع الأنقاض
يثبت بي لمينة القُدرة
مِرْقْ البيت ...
تفاديت الصنين الفَاضْ
وِكِرْ في دوشة الديناميتْ
نتقتَ خُطاي .. تجاهي جريتْ
جريت ... وجريت
جريت قدامْ
رجعت أمامْ
لقيت ساقيني دون أقدامْ
بـ
ر
كـ
ت
حبيتْ
وفي حجرة غناي الغاضْ
وحِلْتْ في أريتْ
جبدت ايديني في إصرارْ
تجيني كُدُر بلا كفين
اتحسّسْت للما فيّ ...
شكّيت إني حيّ ؟؟؟..
ما حيّ ؟؟؟
شكّيت إني جيت ما جيتْ ؟؟؟
وكيف ؟؟
ومتين ؟؟
وداقس وين ؟؟
رقص وسواسى واللاّوازْ
على النِّيل التمطّى جنازْ
رقص في سُخْف ... باستفزازْ
رقص
بالسُّونكي
والسِّكينْ
وسوط الدِّينْ !!!!
صرختَ .. معاذْ
ندهتَ ... معاذْ
معاذك يا وطن ..
يا فازْ ..
جناك منّك .. عليك وملاذْ
خطاوي الكفّت إيدا جوازْ
؟؟؟؟؟؟؟؟؟؟؟

مكثت صراع ترابلة وطين
أقاوم في الغبينة سنين
ولا قدميني
لاالكفّيْن
ومقطوع راسْ
لا نوبة
وزنوج
وحِجازْ
لا بجة
لا كُتُر طيبين
ولا عُكّازي
لا حَجّازْ
ولا زال المطر في سماهو في طور الدعاش ورذاذْ ؟؟؟؟؟
قرّطت عمر غُنايا
لقيتو ...
باقي فِرِدْ وَتَرْ مشدودْ
ضحكت حزينْ
أنا الفاتح سَد الجايين ؟
أم المسدود بفتح مبينْ ؟؟
شفقت على الشُّدر في حينْ
عِرِق فالوا اطمئن .. تحينْ
تباشير الصباح ويبينْ
بعد ما نموت ؟؟
بعد ما يشيخ ؟؟
أبيت
حتمية التّاريخ
أبيت حتمية التاريخ بلا عرقاً يخضِّر ودمْ
وانا الباغتني ريح الغمْ ..
وابيت انغمْ
وصَادَنِّي الجراح الجّمْ ..
وابيت إنجمْ
ما بضّعتَ .. لا ساومتَ فيك مين كانْ
تعبتَ
من المطر
خلّيتو
ما بين البيوت الطينْ ..
وما بين التَضوِّي قزازْ
يرايي ويبدي .. وين ينحازْ ؟؟
ولى يات جيهة يبقى حبيبْ ؟؟
وضد يات جيهة يطغى حزازْ
؟؟؟؟؟؟؟؟؟؟؟؟

غرست انفاسي في الزيفة .. الخريفا بَجيكْ
مطعّم بي لهج شفتيكْ
خمشت من الدُّعاش لونو وهرعتَ إليكْ
لقيت كبد البلد مكشور .. وقافلة عينيكْ
دَخلتِك بي مسام الرّعشة ..
من فرقات اصابع ايديكْ
مَرَقْ بِكْ .. وفُتّ بِكْ .. تالاكْ ..
مَضَبْلِنْ
والمطر ..... جا ....... عليكْ
أتيرب في أوجّ العينة .. تُربال التّوحّدو فيكْ
إرادة وقُدرة الإنسان ْ
وكت يبقى إنبعاثو وشيكْ
إرادة وقُدرة الإنسان ْ
وكت يبقى إنبعاثو وشيكْ

عمال البلد
قوم حيي نضال........
عمال البلد أم خير يا خال
عمال كداح ..الوين ترتاح .. والحال بطال
كدح التربال ...
والأرض الطيبة الكم خاواها وضادا النال
اليوت شغال في نهارو وليل ...
منهوك الحيل ... تحت الرأسمال
آه الرأسمال الياما قسى وعوق رجال
ما خلى نساء ... وعرك الأطفال
لا مسلم قال ... دا خيي بلال
نصراني يحن في قبريال
لا يمين في يمين ... لا شمال في شمال
دولار وريال ... دوار يا خيال
تجويع وإذلال
خرب واغتال ... كل الآمال
ما تخلى مجال ... دون استغلال
السلب حلال النهب حلال والصلب حلال
هدم لذات المسهوكين ....
من أجل الذات مكينيزم انتاج
أبراج العاج
هيصة المكياج
ديباج التاج ... السيخي الصاج
زي أعتى سياج
يتلقى أفواج المسحوقين في الليل الداج
المسيوقين تحت الكرباج
أخوان إصرارك يا حلاج
على إنو الليل بلد الفجاج
وضربة محتاج في نهارا ساج
أبتر من سن سيف الحجاج
الله يا الزول الساقو عزال
أطري الإذلال يا دغري عديل
بيصارع الويل ... حيا ما زال
بالصبر يشيل في الما بنشال
ما إنيقن وقال ...
يا دنيا محال ينصلح الحال
بل عبأ وشال ... جواهو الفال
نازل وديان طالعبو جبال
أشواك ورمال غابات ووعر
بين ريح ومطر ... عرق الشلال
ومطامن بال ... ما لاوز قال
يا ربي أصد من دربي الطال
ما طال لابد يشرق بكراهو الما بنطال
يشرق بالخير ... بالحب ... بالود ...
يشرق لابد يضوي الحلال
إزي يا خال ... كيفنو الحال
زين .... عال العال
مع إنو الحال ما راجي سؤال ...
إيجار البيت ... جيهة الأطفال
مشهاد اليوم ... عيشة الدوبال
أفراح العيد على رحو وبال
عكر للفوق اداهو إذلال
والخوف أم زين إن صابا زلال
الله يازول مشغول البال
في الدنيا يكون مافي استغلال
والشوق رايات ...
الله يا زول الشوق رايات
والله على ناس كلها إحساس
إنو الجايات أجمل
والفات ما فات والفاس
والأرض البكر الفكرة ... الرأس
الخت أساس الليلة وبكرة ...أعظم ميراث
أجمل من دا وأعظم بكثير ...
عالمنا يصير ...ما فيهو أجير
لا ناس فوق لا طيطي رأس
يبقى المقياس الشغل التام بوفا وإخلاص
الخاص للعام والعام للخاص ...
والشوق قدام ... والشوق قدام
والخوف ينداس تحت الأقدام
كابوس البؤس نلقاهو خلاص
أصلا يا خال ... شفقة رأسمال
أما العمال ... أنفاسا طوال
إن طابو نفوس ... إن طال البال
ضيء الفانوس بيكفي جبال
حدك يا رصاص ... ما دارلو دواس
ولا حتى كباس ...
عالم كالشوق وحق كل الناس
إلا الكداس ...عاكاس ..عاكاس
شان دفتر شيك .,.. بسرق كراس
نحنا الوراث ... كلنا حراس
والجاي يدوس عزنا بنداس
أصلوا السواى تب مو حداث
يا حب إنداح ... على كل قليب
إنزاح يا نواح ... دندن يا دليب
بأغلى أنغام ...
يا خطو أرتاح على أحلى دريب
قدام ... قدام في أمان وسلام
يا عالم كون ... بالود مسكون
قوام .... قوام
قوماك يا خال ... حلال ... حلال
بأشواقنا نطوف
الدنيا نشوف ...
اشجار الفال ... الدانية قطوف
شان يربى طفل ... لا غم لا خوف
وإن قال بغم لا يلقى دبيس لا هملي وهم
خاطر مكسوف ...
إنعشا يبيت على صوت الأم
شان باشي تعم ...
من بيت لي بيت ....
يا بكرة يا ريت ... غنواتنا طعم
والعالم خيط ...
والقابض كان ذات مرة حلم
والرامي إنسان ما إنيقن
شان الدنيا زمان
قالتلو ابيت
يا عالم كون ... بالود مسكون
كون حرمة بيت
رتاي وحنون ... ويبقى الدناميت
من أجل طريق ... يمشيبو دقيق
أو قاطرة زيت
للصابر فوق ... ما فك الريق
يا سابق الصوت من تنزل موت
يا ريت خبيت فوق كتف الشوق
لي حال مفتوق ... بي إبرة وخيت
وعلشان دا يكون ... قوم حيي نضال
عمال البلد أم خير يا خال

طعم الدروس
ورينى شن طعم الدروس مادام بكانا مشى قطر
وكيف ذاتا ترتاح النفوس تقبل قرايتاً فى سفر
يايمه حان الإمتحان من وقتو بس فاضل شهر
ما اظنى من جور الزمان انجح واجيب ليكم نمر
كيف ذاتى يا نبع الحنان انجح من آلام السهر
عمرك سمعتيلك جبان خاض المعارك وانتصر
زينوبة كل ما افتح كتاب القاك فى أول سطر
القى الجداول والصحاب القى الجناين والتمر
فى الحصة عقلى أنا قام سدر يمه المدرس لو فكر
كان بلقى قاعد فوق ككر فى الدونكي لسع ما فطر
يسمع كليمة يا عشاي وأغلى الحكم عند الضجر
أنا قلبى كلو عليك جناى وقلب جناى على حجر
والله موش لو كان نهر لو كالنى بسيطان بقر
مادام عقيل الجن سدر ما اظنو من عندك حضر
بذاتو ابوى تلقاهو قام فاتح كتابو مع الفجر
يقرأ ويرتل فى كلام ما بفهمو الناس الكفر
زينوبة كر من حالى كر قاعد لى فوق نيران جمر
غربة وكمان حالاً فقر عذبنى قبل أصل القبر
الشوق متل شوك الكتر طعن الجسم لمن خدر
والله لو ما بنقبل ما كان بفارقك بى شبر
زينوبة دنيا الإغتراب خلتنى زي ورق الشدر
اتحت من عدم الشراب عم الأراضى وانتشر
الغربة اصلو طعيمها مر لكنى بقعد بالجبر
لمن سنين الهم تمر يا ربى الهمنى الصبر
يا خالة :
ما تقولى لى دخل البطون
والفى البطون ما بتمرق
يا خالة شيليها الظنون
والله مابينكن فرق
ما زى بعض لوبي الجروف
قوليها لو كان تنطق
خالتى المجنح ما بيطير
واللاحقه ايدك بتلحق
وين انتى شفتيلك بعير
معقول محكم وينطلق
يا خالة كيف اصبح غريب
وأنا روحى من روحك خلق
والله أقرب من قريب
والغنوة معوان للخلق
ما شفتى ناسا حالها كيف
قلب الجبل ليهن برق
كم ليلة ما غمدو الطريف
سدت دموعن فى الحلق
يتباكو ما شفتى النحيب
ساعتو البيبدا من القلب
آه وآشريري على الغريب
اليومى دمعو بينسكب تلقيهو يرفع الليدين
لافوق يلاهى وينضرب
يا الله يرجع لا متين قلباً معذب ومغترب
طعم الدروس يا يمه ليك
لى كل مهاجر ومغترب
ضاق الكؤوس المرة ديك
وآه من حناضلاً تنشرب
مش كل ما لاح صباح
يتماروا ناسك فى الدرب
الجاي وارد واب ملاح
يا بت ترب زولاً تلب
يبقى الغنا السلوى الملاذ
للقلبو فى الساساق غلب
لو صدق المطر الحراز
ما كان من الأشواق تعب
انتى اللسان الماب يقع
فى زلة لا يوم ينزلق
فيض الحنان المن نبع
لا قل لا يوم نتمحق
جاهو الجنوب سابق الشمال
جاهو المشحتف فى الشرق
جاهوالغرب شادى الرحال
شيل يا غمام منو وأسق
يا الله شدة ماك رحيم
أديتنى أُمين تنسبق
لى ضمى بالحضن القديم
الدافى شوق وعشق وعشق

نورا والحلم المدردح
هيْ .. أقيفِنْ ..
نورا فِيكِنْ ؟ . ؟
نورا ... نقّاحة الجِّروفْ ..
نورا ... حَلاّبة اللِّبيني ..
للصغيرين والضِّيوفْ
نورا ساعة الحَرْ يولِّعْ ..
تنقلِبْ نسمة وتطوفْ
تَدِّي للجيعان لقيمة
وتَدِّي للعطشان جغيمة
والمَخَلِّي الحال مَصَنقِرْ ..
في تَقَاة اللّيل تَندْقِرْ ..
تدِّي لي باكر بسيمة
تَكْسي للماشين عَرَايا
وفوقا ينقطّعْ هديمه
.........
ما عِرفتِنْ ... نورا إنْتِنْ .. ؟؟؟
قولِنْ إنتن شِنْ عِرفْتِنْ ؟؟؟



نورا بِتْ الواطة
أخيتي ..
نورا اخُتْ كُلّ الغلابة
نورا حاحاية الشّقاوة ..
نورا هَدّاية الضّهابة
الأراضي اليَاما أدّتْ ..
نورا ... بقّتْ من تُرابه
وماشي في الأعماق سحابه
مشتهنِّها .. والله جابه
الله جابه ... الله جابه
للجنوب طبلاً يَهَدْهِدْ ..
ليل مشاعر ناس تعابة
وللشّمال طنبور يَسَكِّتْ ..
دمعة الميتين كآبة
........
ما عِرِفْتِنْ نورا إنتِنْ .. ؟؟؟
قولِنْ إنتن شِنْ عِرِفْتِنْ ؟؟؟
....
نورا ....
عايز تقرأ .... قالتْ
فوقا حيطة الدِّنيا مَالتْ
خَتّتْ الكرّاس وشَالتْ
منجلاً .... صَالَتْ بو جَالَتْ
لامِنْ إنجرحت بو شالَتْ
لي التراب فوق إيده كَالَتْ
..........
ومَرّة يوم في الدُّونْكَا لِدْغَتْ
جاء الفقير بالليل حَوَاهَا
ويوم ملاها الهم قطايع ..
جاء البصير بالنّار كَوَاهَا
ونورا ... ما قِدْرَتْ تمانع ..
تقنع النّاس المعاها
مرة شافت في رؤاها ...
طيرة ... تاكل في جناها
حيطة تِتمغّى وتفلّعْ ..
في قَفَا الزّول البناها
في جنينة سيدي سِمْعَتْ ..
شتلة تصقع لي الوَرَاها
الأرض ..
لابُدَّ
ترجع ...
للتِّعِب فوقا ورعاها ...
غيمة ... والنِّيل موجو لاها
والعطش شقّقْ شفاها
الشّمس طَبَقت ضُحَاهَا
الخليقة لقت إلاها
نار ....
عقاب إنسان مكسّر ..
فوق تَلَكِّيات متاهة
وضَوْ من الله .. رهاب مكتّفْ
في وتيد اللّيل معاها
بين ربوع حَضَره وخلاها
فَسّرَتْ لي النّاس رُؤاها
وقالوا .... جَنّت .... ومو براها
ونورا زادت فوق شقاها

و صَدّتْ الأيام .... تحُشْ
تبني لي عصفورة عُشْ
في السّواقي تشوف عزاها
لما شوقه يسوِّي .. أُشْ !!!
تملا ... تزرعْ
ترعى .. تقرع
للنهار في الليل تخُشْ
عِرْفَتْ الشّقَا والشّقَاوة
إلاّ ....
ما عرفت تغُشْ !!!
........
شايلة طولة البال من الله ..
ومن أراضينا الإثارة
وماشي تكدح طول نهاره
وترجى لما الليل يَفلِّلْ ..
تسرِق ألمي عشان خداره
عشان صغاره ..
عشان خداره
عشان صغاره ..

ولما ترجع لي دياره
تنزف أحلام الفقارى
من عويناته الحيارى
..........
لي غُبار الحال تقُشْ
فوقو لي الآمال ترُشْ
نورا ....
تقعد
صاحيي تحلم ..
بي بيوت بي نور ودُشْ
وبالمحبة تشُق دروبه ..
ولي قلوب الكل تخُشْ
نورا ...
تحلم بي وجود
ما مشت بينو القيود
أفضل أفضل بي الكتير ..
بي وطن من غير حدود
........
نورا تحلم بي عوالم
زي رؤى الأطفال حوالم
لا درادر ..
لا عساكر ..
لا مظاليم
لا مظالم
.............
نورا تحلم ..
ولما تحلم ..... نورا ترجِفْ
ولما ترجف .... نورا تحلم ..
ولما ريح الواقع المُرْ ..
لي عشيش أحلاما ينسِفْ
نورا ..... تنزِفْ
وفي الوجود .. وجدانه يهتفْ
حالة .. تقرِفْ ..
حالة تكسِفْ ..
حالة تكسِفْ ..
حالة تقرِفْ ..
وتبدا تقضِفْ ..
ولما تقضِفْ
بالا يهتِفْ ..
وتملا باله أحلام بتلصِفْ
يوم حا تنصِفْ
يوم حا تنصِفْ
نورا ..
لسّه بعيد ..
هناكَ ..
وتبدأ تحلم ..
ولما تحلم نورا ترجِفْ
ولما ترجف نورا تحلم
صاحيي تحلم..
وصَاحْ بتحلَمْ
صاح بتحلَمْ
بتحلم صاحْ

بين الموجة والخزان-حلم انسان
هَرَدْتَ لهاتي بالغنوات ...
وقُتْ يبُردْ حَشَاك يا امِّي
ومن التّعب البلا صَالِحْ ..
تفيقي ..
تروقي ...
تنجمِّي
تسوِّي مكانسِكْ المطرة ..
تضوِّي البيت وتنحَمِّي
تمرقي صبوحة للجيران ...
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك ...
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب ...
تميد بالخُضرة منقسمي
ولا غابار .. ولا هو سحاب ..
وتنهجمي .. من الدّهشة
وتحاحيهُن ...
غناكُن نيي ...
غناكنُ نيي ..
غُنا الوهْمي
ويهتفوا زي كلاب الحي ..
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة .. بقت تشرب من الحامدابْ
تشربي عافيي من إيديّ ...
تدوِّي اليوية بي حِشْمي
تسوّي السّي .. وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني ..
هيلا هوب وقف ناهِضْ
ودكّ عمايد الفوقاني ...
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي ..
وارْمُلا من عصب عشّاق ..
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات ...
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ ..
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي ..
هيا انخلْقي ..
هيا انعتْقي ..
متين مو دايرة ري تسْقِي
ولا في إيد النّزيف نبقَى ...
ولا في إيد الخريف تبقِي
ولا الفيضان يبدِّع بِكْ ....
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي

فيا حزن البلد عوك كَرْ
ويا سعد الولد
ضَرْ ضَرْ ...
مع النّسْمِي
و ألِوْ .. قيمة العَمَل عِمِّي ..
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ ..
دَويها عَلَيْ ..
اذا ما اخر العلاج الكَيْ ...
مراويدِكْ حُمُر صَمِّي
مراويدِكْ حُمُر يا امِّي
بليلتي ... ولا ضبايح طَيْ ؟؟؟
قليلتي ... ولا كُتُر سِمِّي ؟؟؟
وطني ... ولا مِلي بطني !!!!
سُكَاتي .. ولا الكلام النيّ !!!

جية الشليل
شوك الشّوق .. لي الشّوفه آ خي
ضارب في إطن النسج الحي
يا مُنقاشو أحزاني إنشرّت ..
وادي الفرح إتمدّدْ صيْ
يا راحلين عِنْ دُغُش اللّيل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضيْ
يا رعّاوة العرب الرُّحّل ..
ما لاقاكم في المطراني
في كاويق الجرف الأمحلْ
بين أسراب الرهو الرّاحل ..
ساند أكتاف اللّيل الميّلْ
عِنْ ساساق الغيمة عليكم
بين رقراق الخيمة معاكم ..
ما أديتوهو شوي بي حَرْجَلْ
آ رطانة الليلهم ليّلْ
ما لاقاكم في ونساتكم
بين الشّادي وبين كاساتكم
في صلواتكم ..
عِنْ دعواتكم
أو دقساتكم
عِزْ خلواتكم
زول زول الله إن ِمحِن آ بسألْ

الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شِقّيشْ قولِنلِّي
ما لاقاك طالع مندَلِّي
المطعوم من طيبة أمّاتو
كالفَجّاج الندّ نباتو
موج البحر الأحمر هوجتو
وعِرْق العَرَق اللاّوي ثباتو
جانا الشُّدَر الأخضر منو
ونار الشُّدر الأخضر جاتو
راح شقيش أب قولاً واحدْ
ليش ما يرجع من غُرباتو
طوّل .. طول ما طلّ علينا
وقاطع مننا جواباتو
الغابات جات تنشد منّو
العُربان راجين جيّاتو
أديناهم عَلَقو وعَرَقُو
وصورتو يقلِّب في كتباتو
ضُل رشّاشُو ..
ركيزة زولو
ساعات سِلْمو ويوم حوباتو
سِنْ طوريتو ..
ولون أبرولو
وحِسْ طمبورو البي نغماتو
لهلب عشق النّاس الفُقَرا
وبرّد جوفِن ..
بغنواتو .. الدّخَلت فينا ..
تمرق جينا على جلاّتو
وجيداً جينا ..
طلقنا وشينا ..
ووش أطفالنا الليلة حلاتو
غني معانا غُنانا هويتو
غني العالم غني حياتو
لا ساومنا عليها قضيتو
ولا فكّينا من إيدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي .. شليلك ذاتو

الشوق من حاطف

الشّوق من حاطِفْ ..
لا قاطِفْ
يتلمّ .. يهز ليك يا نوراي
يا دَرَقة وسيفْ
يا حُضناً كيفْ
من شَرّ الصّيفْ
والشتا ضاراي .. ضاراي
يا شعلة عز بقّت جوّاي
عدّت بي ضلام بحراً عاصِفْ
يا نور قاعِدْ بِكْ .. قايم بِكْ
شايلك مورودة ومتوكِّلْ
يا نورا على الله .. علينا
والفرج القرّب .. وحايم بِكْ
يا بِت العرب النوبية
يا بت النوبة العربية

بي فردة نخوة بجاوية
أو شدر الصّحوة الزِّنجية
دسيِّني من الزمن الفارغ ..
من ريح المتعة الوكتية
من شر السّاحِقْ والماحِقْ ..
بين دَبَش المدن المدعية
والليل يتحكّر بيناته
كحّل بي دبشو عويناته
يا شمس الناس المسبية
روّحت اتنسّم أخبارِكْ ..
لا تشفَقْ
قالو لي نصيحي !!!
وأنا عارفك ممكونة وصابرة ..
لكن لي ناس إلاّ تصيحي
جواي مأساتك مغروسة ..
يا طفلة تفتش في باكر
ما بينات نخلة وأبنوسة
الجوع العطش الفَدْ واحدْ ..
الفقر الضّارب زي سوسة
الخوف والحالة المنحوسة
يا بحر الحاصِلْ ..
لاكْ ناشِفْ ..
لا قلمي الفي إيدي عصا موسى

يا ام غلباً حار .. ينْبُرْ فينا ..
ما عدّ صباح من ها .. الميناء
كَدْ الكُدّاح شايلا سفينة
النّاس عوجات .. تحرِسْ .. ترْجَا
ترجعبو سلاح وأنوار زينة
بمبان ..
شوفونير ..
آفات ..
ويسكي ..
للنّاس الدّمّنا بنزينا
فِقَراً تسترزقْ من دينا
بايركس إبريقن ..
والموية ..
تتحدّى بياض الوزّينة !!!

خرزات السبحة أمريكية ..
خُصَل الموكيت إيطالية
دفتر شيكاتاً ربوية ..
في الجيب
والسيرة النبوية
جنب مصحف جوة البترينة
تقروقتِك .. ديمة على القبلة ..
ميهية إبريقِكْ بي طينا
السِّبحة أصابعِكْ يا صالحة ..
يا بت النَاس الصّالحين
الذِّمَمْ المشرية الطّالحة ...
شتّان بين دينِكْ وبين دينا
شتّان بين يُحمد
وحاج أحمد ..
وقُدّاس ناس ياي وسلاطينا

شِلْناكي مع الخلِق النايحة
على أرض فلسطين الفاتحة
البركة في رملِكْ يا سيناء
إرتج أسير الدعوات
ما بين آمينك وآمينا

يا نورا
شليلك ما فات
بي عدلو شليلك جاييكي ..
ما جايي ألِم التمرات
لا أبكي وأقابل بالفاتحة ..
في زولاً ليّا مِرِضْ .. ماتْ
جاييك أتزوّد من غُلبِكْ ..
واقفِر خطأ غيمةً ما جاتْ
نَبْحَتْ لها كُلّ المعمورة
والنّاس يوم تمرُقْ مدخورة
يا نورا نسلِّكْ غنوات
وآمال بي باكر مضفورة ..
طُلاّبك وأقلامنا هويتِكْ ..
قدّامنا قضيتِكْ سبّورة
رتّبنا الخرطة البتوصِّل ..
أدِّينا الخاطر يا نورا

بالمدّ الثوري المتدافعْ ..
فوق دربِكْ تَبْ ما متراجعْ
رغماً عن عَنَتْ الأيام ..
والزّمن الجهجاه الفاجِعْ

ما رمل الدّرْب الوسطاني ..
وكتيني الرّاحل وصّاني
لا ترجع ساكِتْ يا شافِعْ
لا ترجع شافِعْ يا ساكِتْ
خُتْ بالك وعينك في الشّارعْ
لا ترجع .. لا .. لا
الشَارع فاتح في الشَارعْ
الشّارع صَانْ ..
صَانْ الشارعْ
جاييك كايسلِكْ يا نورا ..
لا كُتْ متسوِّل لا صَايعْ
لكن العسكر باغتني ..
يا نحس الحلم الباختني
يا عفن الأيدي المأجورة
نوراي الخطوة الجابتني
للمدن الصِّبحت مهجورة
يا ناسي بطاقتي عويناتا
البضهب عنِّك بيناتا
تلمحني الفقراء .. وتلفحني
في ليلها أغني معاناتا
الفجر الكاذب يرْشَحْني
ترشَعْ بي الواطة سماواتا
شدرات السّافِل تَنْتَحْني
بي الحاصل أعبي مساماتا
الناس القُصّر تنصَحْني
أتْكَاجَرْ أتوِّر نجماتا
القمر الطّيب يفضَحْني
تنبحني سجونِكْ وآهاتا
كَجّنّا سجونَكْ لولاكْ
كم عشقاً يتيرب واطاتا
منعول الزّمن الخلاّكَا
سلّمت الوطن الهمباتة
على كيفك سيفك يتحَكّمْ
يا سوسي تكنّك ما بتعلمْ
بي شتلة تقرِّبْ تتكلّمْ
يا حَال البتألم وساكِتْ
يا حال السّاكِتْ وبتألّمْ
يتفتّق جُرحَك يوم نبرأ
ونتلمّى .. وقيدك ينحطّمْ
وين عاتِبْ هارب من بُكرة
وخطو التاريخ البتقدّمْ
للزّمن الإنساني السِّدْرَة
حا يوقِّف قولو وما بيرغَمْ
المنفى في شرعو كما الهجرة
والسِّجن متل دار الأرْقَمْ
والشّارع قارِنْ في الشّارعْ
رغماً عن عَنَت الأيام
والزّمن الَجهْجَاه الفاجِعْ
بالنّفس النّازل والطالعْ
وأنا واحد من شعب مضارعْ
سمّيت ومشيت ما متراجعْ
غنيتك يا عشقي وتيهي
يا بلاداً كم سمحة وجيهي
لو لِقَتْ النّاس البتدورا
الأيدي التنفض كانديقَا
تنقُز تلحقا في الكانديقَا
ترتالا .. تكوس لها في الجيهي
ويا بلدي الواقع بك واقف ..
الشوق من حاطف لى قاطف

البحث عن ذاكرة لوطن مفقود
عَبيّت زُوادتي الرّيقة من بايت القَوَى ..
الوطن الدّشَرْ ...
غيمو الرّبَطْ
ساعة بقينا من الرّوَى ..
شبّة مطرْ ...
سافرت لِكْ بأشواقي لآخر المنافي ..
بَحّتَّ في كل المخافي ..
وكُسْتَ عَنِّك في الخُرَطْ


في التواريخ الرؤومة ..
بين نقوش نبتة ورسوما
في الطّرابيل العظيمة
وبين لُغة مروي القديمة
وخَطْ .. في خَطْ
راجعتَ بِكْ كل الاسامي... البعرِفا
كل الُّجمل .. حتى الضمائر ... وأحرُفا
صحّحتَ بِكْ زمني الغلطْ
باخَتّبِكْ قلبي الشّقِى ..
وبشرتو بي لُقْياك عَبَطْ
يا طيبة زي شارع وَسَطْ ..
يمشيبو كادِح وارزقي
وممتنعة زي قبض المياه
والمافي
والما بتلقي
غالِبني جيتك أصادفا
لا في المعابر والموانيء المُترفة
لا في المطارات الوسيمة كما الفراغ ..
لا الأرصفة
كل الدّروب التّعرفيها وبعرِفا
التألفيها وبألفا
خَشّيت دغيش سِعْن الدِّني المرفوع على سِيبات وفا
رَوّابي كان قُطّاع غني ..
وشوقاً مَفورِنْ وانكفى
قِدّام خُطى الوجد الِحفى
غابت صباحات القُرُب ...
وبَقّت ضلامات الجفا
و ضَي المصابيح الجريح ..
كِترْت علي الرّيح .... وانطفا ؟؟؟
هوي يا بِنيّة من الغُبُش ..
من حَرْ أباطهم مُترفة !!!
وين انتي شان نرقد قَفَا
وين انتي وين .. في يات دُغُشْ
ما بيننا بين غيبتك كفى
لو بَقّ حِسِّك في هشيم دبش الضياعات والسأمْ
زي أغنية شوق ..
زي نشيد ..
اندبَّى همسِك زي نغمْ
او خبّ خطوِك زي شهيد ..
رَفّتْ مسيرِتِك زي عَلَمْ
ما كان مهابات الصِّقور
(نخّت) تحت رخّة رَخَمْ
وين انتي وين ...
ما كان هجم ديش العجم ....
والدِّنيا ضَوْ
وامسن سبايا الاغنيات
العُزّل ... ألآه ... شِنْ تسوْ ؟؟؟؟
ولافي الكفوف الخاوية سيف ...
لا في الكتوف الزاوية ضَوْ !!!
دَلّجتَ درب الاربعين ..
صاقَرْ قوافل الرِّق .. سنينْ
برّاً
وبحراً
حتى جَوْ
أشريكِ قُلْتَ من الزمنْ
واعتق معاك رِقّة مشاعري ازوِّجك كل الوطنْ
كل الرِّجال الحملو ارضك بالحلال ...
وافتق سحاب العشق شَوْ
ولا بنتي في الزِّنج البَجَمْ ...
لا كنتي في العرب الأشوْ
لافي شلوخا ..
ولا الوشم ..
لا في شيوخا ولا في عَوْ
بل فيكِ غشّاني الزمن ...
ادّاني صَرْصَرْ وبعتو نَوْ
كوترني .. بي حبل الوَخَمْ
كُلْ ما انقطع توْ .. باَنْ لي .. توْ
ناقِزْ وراكْ ..
ناقِزْ وراكْ ..
ناقِزْ وراكْ ..
انترْتَعَتْ رُؤياي ..
هَكَعْ ..
ما بين أريت ... يا ام زين ... ولوْ
وبين تبقي وين ..
لاكْ في الوجود
لا في العدمْ
لا في الحقيقة ... ولا الوهمْ
لا زين
لا شين
لا البين بين ..
يا راحة الباقالو هَمْ
لا عنِّك أفتاني الزّمان ..
لا مِنّك إنقطع العشمْ
يا ريتو أغناني الكَمَانْ
آ طيبة عن صوتِك نغمْ
من أعلى ميضنة فيّي كان أعلنتَ موتِك للأُممْ
أو .. صِحْ بجيتك لى الرِّمَمْ
لكنو صمتك طال ...
وحَانْ ميعاد زفافي على الألم
قلت ارفع ايديني واقول ...
خاني الصبر ..
خان وانهزمْ ؟؟؟
زي ما انهزم كمّين نبي ...
وخانت على التاريخ ذِممْ
آ طيبة أخافك ؟؟؟ واللاّ اخاف
السُّبة واللّعنة الوبيلة ؟؟
تحل وراي كما الجفاف ؟؟
أو..... تار على اكتاف قبيلة ؟؟
معلمي اللّــــه من عتاد ..
يبرِدْ حشاها ... ولا في حيلة
بَلا تأمِّل في البُعَاد .. سنين ...سنين ..ودنين ... طويلة

وكيف ؟؟ وكمْ ؟؟
والإنأخد بالدّم غَصِبْ ...
مافي البرجِّعو إلاّ دَمْ !!!!


آ طيبة هيلة ..
سلام
عوافي
يا أصيلة .. كما المَعَانا
أو .. بديلة عن اللِّي مافي
يَمّه أدخلي على غُنانا ..
يا أمُرقي من القوافي
يا أحذرينا وما تخافي
وما بنخيّب حاشا ظنِّك ....
ينفخوها وما بتموتْ
حيّة نارِك ... حيّة يوتْ
خُتِّي قِدْرِك في الأثافي ..
يوسف الفي الُّجب بيمرُق
ضاربا ريقة اليلقى قوتْ
روقي أكنِّكْ ..
واللاّ كَنِّك ..
تاوقي في البحر الخرافي ..
يونِسِك في ياتو حوتْ
سَمّ ينده جوفو حافي ..
وهِّطينا على الأثافي....
وهِّبي نارك لا نموتْ
يا حمامة غار محمّد ..
يا خيوط العنكبوتْ
يمة كُسناك ضُمّة مافي ..
الدّروب وين غيّبنِكْ ؟؟؟
في سؤالنا الضّارِي عَنِّك ..
سَدّن ابوابِن بيوتْ !!!!
والبيوت البشبهنِّك ..
انكرننا وانكرنِّك !!!
ننكشف لا لوم عليهن ..
بس ها كيفن يسْتُرنِّك ؟؟
وفي سُكاتنا الجاري مِنِّك
رحّبنْ بينا السجون
الدرادر والمنافي
فينا مَنْ روّح فدايتك ..
وفينا من لا زال ...
وفينا
مافي من بدّل لرايتِك
وانتي في ذات السكوتْ !!!
التراب يتشهّى حِنّكْ ..
السِّحاب عابر يفوتْ
واللاّ يكمُد للعيون
بالغُبار غُمّة وسوافي
وانتي يا آخر المرافيء
يا امْ وجوداً بات خرافي
في صحاريك داخ غفاريك ..
من برِد زمنو الرِّعافي
دون كواريك ..
مات واتاريك
غبتي بي كل المدافيء
يا لساريك .. لاك موافي
لا كمان قادرين نسيبِك نمشي في الزمن المجافي
ما عهدناك عاد تخافي
كانفعالات المُراهِقْ ..
شابكة كالشّجَر الضِّفافي
خيلِكْ - الرِّيح - حين تنهّدْ
لوحة التاريخ بيشهدْ
لونا والدّم الإضافي

إلاّ يا وتري وغُناهو ..
راحة أنغامو .. وعَنَاهُو
يا نبي الثورة الغشاهو
برداً أكتر من غُتَاهو

الاّ يا بِتْ جاك زمن دارِعْ الأيام قُلُبْ !!!
الدفاتر والكتبْ
إستحمّتْ بالغُلُبْ
التلاميذ النُّجُبْ ..
طيّشا الفقُر ....
الغبينة
صنّت الأجراس وجينا
إلاّ يا .. آخ ... ما لقينا
الجوامع مستباحة ..
والمصلّين صَرْ جُنُب
الكنائس جالبا دينا !!
والمدينة تبيع عوينا !!!
لي النخاسية الغُرُبْ
لي اللُّحاسية وعُقُبْ
تشتري آفات الرُّعُبْ
والهتافات الجُرُبْ
عربدت باسم السّما ..
توّكت ريح السُّحُب
ومن ضُروعاً .. كان تكُبْ
كل أطفال الفقارى ..
وكلهُنْ في فَدْ شُخُب !!!!

في اللُّغة الجرسية .. سُبْ
في التُّقى النجسية .. سُبْ
في الوقار الفاوه ... سُبْ
في شعار ما ساوى .. سُبْ

واللاّ اريت ما كُنّا منك ..
لا في بيناتنا القُرُبْ
كُنّا اقلاّ نشوفو عادي
التردِّي الجاي وغادي
سادي في النعم الزيادي
وابن آدم بالأيادي
لى سُترة الحال يكافِت ..
غابة غابة ..
ووادي وادي
ينبح المسكين يا طيبة ..
طيبة يا راحة الفتارى
وواحة الفي الصّيْ حيارى
عورة الشُّرفاء الفقارى
سُترتها ولُب المباديء


يا بنية الأُجّر ام خير ..
أو نبية الشجر الطير ..
يا رسول البسمة للاطفال ... حبيبة نيل بلادي
يا طليقة الغيم ..... عروس طين البوادي
المناديل بانتظارِك ... والايادي
معبّا شوق ..
يا طيبة ..
طيبة ..
طيـــــــــــــــــ ...
ولا حياة لمن تنادي
بَكاك بكيتني .. سَكَتْ برايا

كنت حافي على إبر ..
بِتّ حابي على شظايا

من انكسار رمّاشْ عيونِكْ
فوق مسام سام المرايا
من كُتُر تعباً تعبتو ..
قلت ألقاك ما كَفَاية
يا تكمِّلي فيّي صمتِكْ
يا أخلِّص بيك غُنايا
دي الحنايا وراكِ يبستْ
وامست آشميق الخلايا
وبِتّ أمسِّرْ من حروفِكْ
وأفتل الأيام .. قراية
نبّقْ الغيم .. برضو إرضِكْ
ما استجابت لي سُقايا

وقُلتَ اخطِّكْ بي دمايا
يا اصابعيني ابقي ريشة
ويا شراييني الدواية
وقنِّعي الرِّيح الورايا
النّكعْ بالخيل ..
محالاً ..
يدِّي بي بَقَر الدّرَايا
انتهت كل الخفايا
وقلت اكوسلِك في الخطايا
لمّا في ذات لُقيا حَرّ ..
وزاد هواكي على هوايا
وقمتي خنتيني معايا ؟؟؟
اشتكيتِك لى القمرْ
وضُمّتْ انسام السِّحرْ
الرياحين والزهرْ

شهدوا ليّ عليك يا اخيّة
جاء القمر سوّاك بريّة
وباعتزاز بى نبرة حيّة
صاح في جمعنا يا بريّة
من يكن من غير خطيّة

؟؟؟؟؟؟؟

وقُمْ رميتِك بالتحية من اللِّي فيّ
فيا .... وفيّة
يا معاكي تغيبينا ..
يا تعالي وابقي جية
للبعيشو غَصِب عشانِك ...
والبموتو بحسن نية
حَارْ علينا بعد طراوة ...
وبين عيون احباب تقيّة
نبقى في كتمة وشقاوة
وبين أرَاذِل
وارزقيـ….....ـة

كفاك شكية !!
كفاك شكية !!
يا التّشرِّكْ لي غمامك ...
وتحتَك الانهار قوية
ما انسرق ذات ليل سنامَك ...
لو قبيل كُسْتَ الحوية
كفاك شكية !!
وما بيضيع حق لا قضية
لو في طُلاّب من وراهو
ونية بيضاء وبندقيـ……ـة

عروس الطين
بيني وبين النهر ضحايا
وكم من قتلة ونصّابين
وقدر الغيم اللمّا سمايا ....
شالوا الريح وبي حُمرة عين
حبل البئر ودلوها منتّف ...
وحارساتنها دابيين


ريقي دقيق .. والخطوِ مكتّف
ما بين كهنة وربّاطين
وانا ناذرلِكْ ، كان أسقيكِ
وترجعي طيبة عروس الطين
ويرجع عصب العشم الفيكِ ...
وزي ما كان من قبل سنين
يا ترقوة الحلم الزّامِكْ ..
ما أقواك على السكّين !!!

لما غِشَاكِ الصيف الحارق ...
حتحتيهو الصفق الأصفرْ
والنوّار اليا دوب مارِق ...
علمتيهو تمُام ينضرضرْ !!!
فرعك عِز الزّمن الزانق ...
عاهد ليفك وابى مِنْ يكبْر
شان ما يبقى حُراب ومشانق ..
واللاّ مطارق في ايد العسكرْ !!!!
وشان الساق الناجرو الخالق ..
ساترو لحاهو ... يفضِّل أخضرْ

روّضتيها جذورك ترحل تالا الموية التحت الأرضْ
وفوق الزمن الريحي الأمحل ..
كيف تنماسك وتسند بعضْ
ما كان عَرضِك الا الطُّول ..
لا كان طولِك غير العرضْ
وين بالساهلة يفرِّط زولِك
واللاّ يفوت المال والعِرْضْ ؟؟؟؟

قال طيراً نفد بي حِنّو ...
لى جملة عَقابو يغنوا :
يا أكباد الرفاق لا تئنو !!
طرِّقوا لى المناقير سِنّو !!

شن طعم العرق والدم
واحنا عوجنا ما عدلنو ؟؟
هِبّن يا طيور من جم ....
رخمتين فوق صقر كتلنو
حُلماً زانو ليك كابوس ...
وراجنبو الليالي يصِنّو
والوعد المشتت روس .....
وكاويق شِنْ بترْجِن منو ؟؟

وما بتنغشّن ... حاشا وحاشا
وما بتنكسرن .. أي والله !!
وما بتندلّن لي حباية
ودود معقود في شبك الباشا
وكم هبّرتِنْ شركو وطِرتَنْ
لي قندولكِن في الحواشة
وقلتِن شارق
فجراً حارق
وكل الوخم الزيف يتلاشى
وتنفض طيبة غبارا العالق
وتقبض نسمة خير ودعاشة

وبيني وبين النهر ضحايا
وكمين قتلة ونصابين
وقدر الغيم اللمّا سمايا ..
شالو الريح وبي حمرة عين

مناقيش العدالة
مِنِّي متعشِّمْ طلوعِكْ ..
كُلِّي مستنيك تعودي ..
ويغسل السّاحات رجوعِكْ
في حشى أحراش الليالي
منتظر بقّة شموعِكْ
تشتلي الضّو في الضّهابة ..
ترخي للجايعين ضروعِكْ
يرجع الطير المهاجِرْ ..
يملأ في الفجّاج ربوعِكْ
.......................
في كلام النّاس بفتِّشْ ..
بين عوينات المدارِسْ
في صدى آذان المساجد ..
ورنّة أجراس الكنائِسْ
في إندهاشات العذارى ..
في إرتعاشات الموامِسْ
في بحر فرحان يبشِّرْ ..
موجو لي جية النوارِسْ
الرّوَاويس طَمْبروك ..
وهزّ بيك في الدّارة فارِسْ
.........................
بين سُكَات القرية أفتِّشْ ..
بين هضاريب المدائنْ
يا نسيماتاً تَكَرْبِتْ ..
شايلة أشواق الجنائنْ
لي جديول حلقو ناشِفْ ..
أو عَرَق تُربال يكادِنْ
في وشي الأفراح بفتِّشْ ..
بين قفا اللّحظات أعاينْ
بين سواقير الفقارى ..
الجاية من تالا المدافِنْ



مَرّة طال اللّيل عليّ ..
ووصلت الآهات مداها
قلت لي النجمات مو جايي ؟؟؟ ..
قالت الأيام تراها
يا ضيا القمرا القُبَالي ..
شوكة الظُّلْم الخيالي
عَسّمَتْ فوقنا اللّيالي ..
خُبِّي في إسراعِكْ تعالي

يا مناقيش العدالة
بتنا فوق الصّبر عالة
يا تعاويذنا وعَزَانا ..
خلِّي نور الفرحة يطفُرْ
من عوينات الحزانى
صخرة الأحزان تقيلة ..
واحنا ما بنملِكْ سِوانَا
قولي هيلا هوب معانا ..
من على الشّارع نشيلا
سكّة العمر الطويلة ..
ترتى في الجايين ورانا
صرنا زي رحّالة عنِّكْ ..
فَتّش الكون تبني لبني
وراح سأل طيانة تبني ..
وقالوا جاية
بالعوينات البقومن بدري شايلات القراية
في تلوت الليل تبوِّغْ .. سارقة للدّنيا السّقاية
ولما تورَدْ ..
بنسلينا ..
الجَرْدِقَة ..
القَرَضْ ..
المحاية
جاية من ضهر المسافة ..
البين بناء الطِّين والسّرايا
طالما في الدنيا ناساً ..
فاتو للجايين فداية
وناس على جلاّتا تكتب بالثبات ..
والنيل دواية
جاية .. جاية
دفّة التاريخ في إيدا ..
دَمْ عروق أماً بتنده
راجية نُص اللّيل وحيدا
بيّتَتْ في القُلّة مويتو ..
وزادو في المُعْلاق عصيدة
جاها في جواب يسلِّمْ ..
للبلد داني وبعيدا
يمة يا نفس الوصية ..
الكل ما شَرَقَتْ نعيدا
يانا يا شخب القضية ..
الصافي في قدح القصيدة
مانا قنعانين تملِّي ..
من دواية الصَبر نكتب فينا والإصرار يملِّي
تنعدِمْ موية وضونا ..
بيها نتيمم نصلِّي
الزّمَن ينقُض وضونا ..
تاني نتوضأ ونصلِّي
ونمشي فوق دربِكْ نباصِرْ ..
في الرِّمال والشّوك نحاصِرْ
بي شُعَاع بكرة المسافة ..
وسطوة اللّيل والعَسَاكِرْ ؟؟
تنهزِمْ ريح العوارِضْ ..
والمواريث التّعوقِكْ
ومن شَقَايا الحال تبقِّي ..
وتقدَحْ التّاريخ بروقِكْ
وكلّما مَرَقَت غبينة ..
تمشي لي داخل عروقِكْ

كرويات الصّبر البيضاء
كرويات الصّبر البيضاء انهزمتْ
ووجمتْ
وخرّ جوادَك ... قبل يقرِّبْ
حمُيّات الغُلُب السّوداء
إنلمّتْ
وضمّتْ
وغَزَتْ أجسادَك .. وبتّ تهضْرِبْ

من هضريبك ومُر تعذيبك ..
بين النخلة ومجرى النسمة
انساقط طاير ...
فَتْفَتْ
حَتْحَتْ
ريشو قُصادَكْ ...
وكان ده حبيبك ... وقُمت تجقلِبْ
بين القيفة وباب النّهر ..
دبيب الرِّيح من دَبَش القهر ..
اتلوّى اتلبّدْ ولَدَغ الشّيمة
الشّيمة انكفتْ ..
البحر انخجّ ..
الزبد انعجّ ..
الطين انحتربْ ..
ومرقت عقربْ
ورفعت شارة ..
اندفعت فارة
تجاه المركبْ
ووقعت سارة على صنقور رواسي قريبك
وقام مِنْوهدِبْ
وكابسو الجندبْ ..
وكان دي امجادك
بين الميضنة والإرصاد
انجرحت غيمة ..
الغيمة الطيبة وحاملة حلالْ
من ألق البسمة الفي الأطفالْ
من عَرَقْ النسمة الفي العُمّالْ
والنّاس الفَالْ
انسرحت فيها شظايا آذان الوقت الواقع
بين تغريبك ... وسرقة زادكْ
مَدّتْ إيدك تالا القبلة ... رشاشها يصيبكْ ..
تسبي نديهتك ..
تفقد جيهتك
تنزف تنسف دانات دعة الهوس الديني
الطيني
الجيني
قوافل اورادكْ
تقضف ..
تركُض تالا جنازك ونعش أولادكْ
باري نحيبك ..
ترجف تتعب ..
تغضب تهتف ..
تلقى قُصادَك سدُّ مرابي
أرزقي ..
رباطة
وكور همباتة ..
لحى ونخاسة ..
وكل السّاسة الباعو نصيبك باستشهادكْ
عاد ان شاء الله تكون الجنة الماهلة ميعادكْ
إلا الحاصل ديل حُسّادكْ
بعضِ يقول الله لا عادكْ
وبعض إن لاقي طريقة يعيدك
تاني عشان الموت يصطادكْ
يا مجلوب في سوق الآخرة ..
ويا متمقلب تحت جهادكْ
خرّ جوادك ..
مات الطاير ..
لدغت شيمة
كرش الغيمة إنبعجت
دمّت ..
عينيك طمّت ..
وغمّ قليبك .. وكان دي بلادكْ
وين مستغرب .. ؟؟؟
تقدر تكسر حمرة عينك ..؟؟
تنكر سيفك ؟؟
تابى جفيرك .. ؟؟
دابك تقوى
يا بني آدم .. تفقد مرة .. مريرة ..
ضميرك تكسب ثروة ..
وتلقى العالم تحت سريرك
تشبع
تروى ..
وترضع ذاتك ..
من لذّاتك ..
وحلو الحلوى
من ما تبلع يوت تتبرع ..
وكلك نخوة ..
صدقة لعمرك .. وباقي حياتك ... ونصر الدعوة
حبّة جوامع ..
وقبة صوامع ..
وكوتة
وكوتة
تفوت الفوتة
بأسرع صهوة
عُمرة وحجة ... وتسأل ربّكْ
يقبل توبتك يغفر ذنبكْ
يمسح سفّكْ ..
خيرات شعبكْ ..
اصلها كانت عترة في دربكْ
لما تعبت ... وفاتك حزبكْ
لما ضهبت ...وخانك قلبكْ
كانت هفوة في لحظة سهوة
عن الإنسان والحال الأسوأ
ودابك فُقتَ ..
وجاتك صحوة
وجيتَ تكفّر ..
يا رب تغفر ..
اغفر ..
اغفر
عبدك خاسر شيء ما بيسوى
انت القادر ... إنت الأقوى
؟؟؟؟؟؟
يا البتخادع حتى الله .. !!!
وين الشُّهرة .. المال ... والجاه ؟؟؟؟
وين السّطوة ..؟؟
الجّشَع .. ؟؟
القسوة .. ؟؟؟
اركزْ ..
اركِزْ
لا تجيب رَخْوَة
يا مِتلبّك في الأدران ..
الحجر الأسود ما هو البروة
وما ها مكاوى الكعبة تجيها ..
حين ينكَرْفَسْ توب التّقوى
ومافي خُرَط لي الجنّة تودِّي ..
لا في خُطط ممهورة برشوة
والمشروع الديني الخالِصْ ...
ما محتاج لدراسة جدوى
يا من قال يارب من قلبو ..
رد الخالق دائماً أيوة
اركز ..
اركز ..
لا تجيب رخوة
اركض ..
اركض ..
تالا اشجار العملة
واقصِفْ ..
اقصِفْ من اوراقها ..
يمكن تستر عورة شينك ...
وما سواهو زمانك جملة
اركز ..
اقوى ..
ولِفْ بشكيرك فوق الرأس ... النشّف غيرك !!
لا تستهوى ..
قضّي منافعك وتم العُمرة
وفوّر موية زمزم قهوة
اركز .. اركز .. لا تجيب رخوة
ماك غلطان .. !!!
غلطان الشعب الجزّ جراد الغفلة كفاحو
الجنى أرباحو .. ضياع أرواحو
وجيد للحاصد ...
وبخت الحاصد
ماك غلطان !!!
غلطانين الشهداء الراحو ..
الواحد ..
واحد
ماك غلطان !!!!
غلطان الحزب الجمّ سلاحو وخيلو تناهد
ماك غلطان !!!!!
غلطان زمنكْ
واصلاً وطنكْ
ياها جراحو وعندك شاهدْ
رَفْضَك .. سَجَنَكْ ..
شان الكادح
والمتكادح
يلقى صراحو .... ويبرأ السّاعِدْ
تهتف لامن تقضف دم ..
وشارعك هازيء ..
يهز اصفاحو .. وبرضو تجاهدْ ؟؟؟
لامن صَقّرْ سن منقارك ....
لامن طايرك قصو جناحو ....
وخرّ يكابدْ
ما حَسّابَكْ ... إلا عذابكْ ..
وليلاً دائماً كارمه صباحو ..
ونجمك ساهدْ
لما بديت تفرز لي عيشتك ..
لاكو عويشتك ..
واجمعوا جملة بأنك تالفْ
وانو سقطت .. مع أنك واقفْ
فوق اسمنت وتحتك عملة
هم ساقطين في البرد الناشف ..
وجاهم زاحف قوز الرملة
الإملاق العيش الشاظف ..
وفي ظلمات الزمن العاصف ...
قاسي عبور اليم ... يا نملة !!

وهسه غلابا الدنيا الكنت بتتعب غنية عشان يرتاحو ..
المنك راحو ..
الكجنو حِنّك ... وعنك أشاحو
ضراعم غادي
عليك يتجارو .. بدون ما تنادي ..
وصاروا نفيرك وقت حصادك .. ورابى نصيبك
هرِّب ..
هرِّب ..
خير بلادك برة وسيبكْ
يا أوعية البلد القطّتْ ..
ما بيسقيك الدم الفاسدْ
ويا أودية الولد الشطّتْ ..
ما بيشفيك اليمّ الراكدْ
إلا الدم البدأ يلقّط ..
واحد ..
واحدْ
إلا اليم أب غيماً نقّط .. وجاييك قاصدْ
يا محبوبة في وضع خريف ..
شالع دجلو ..
وكضباً راعدْ
بيت راكوبة ..
وحوشو صريف ..
سَوّسْ مِرْقو ..
وسقفو يناهدْ
احسن تحت المطرة نقيف ..
بي كفيك ..
كفّي ..
والسّاعدْ
وراسنا ...
نضاري الطفل الواعدْ
لامن يبقى سمانا نضيف ..
من تخويف ..
تسويف ..
من زيف
ونلقى الوطن الحِنْ ..
مو الطاردْ
واللا الموت
الدغري
الواحدْ

عيوشه
منبوشة .. منبوشة
نبشوها قبالك .. بت حالا زي حالك
ذي كلمة مربوشه
عودها إنبعت حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. ولا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مقشوشة
قشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الهايم .. طول النهار حايم
يلبد إذا ما شاف صحبانو مكشوشة
يضحك إذا الكومر .. قبل على كوبر
ولا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
عتالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. والما بدور فتيش
الارزقي السمسار .. إشمعنى نحنا وليش
إحنا الحرامين ولا البدسو العيش
الزول يخاف يكفر .. يرجع يقول معليش
شقيش نقع شقيش .. حتى السجن مافيش
مافيش يا عيوشة
من تكبري آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت .. لامن هجرت البيت
فض المطر صديت ..
أو صددوك غصب
دارك لقيتا حرب
كرت عليك فريت .. كان مافي غير تنفد
بي لونك الأسود .. بي شعرك القرقد
وبي فالك الشامخ زي تاج أبو الهدهد
لامن يطير في الجو .. من ها المدن ينفد
حاشاك من عيب تب
لي شينة ما ختيت .. دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو .. علشان تمسي تبيت
ويتربو زي ما ربيت
كم للعرق شديت
زوغت أمن .. كريت
جاملت جاراتو
وأو تتم ترحل لي سيد خلاف السيد
يتغيروا الأسياد .. لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا الواطة
في مدن تجز الراس كان زولو ما طاطا
كت مافي ولا أبيت .. واصبحت مقطوع راس
زي ديل كتير من ناس لا أوضة لا ضل بيت
وفتحنا لاقيناك .. أول ما شالنا الحيل
بالراحة في ذات ليل
يا أبونا خليناك .. خففنا ليك الشيل
تقلت بنا الخرتوم
وفرنا لقمة عيش .. موية ومحل للنوم
سامحنا .. عافينا .. يا أصلنا الحنّان
غيرنا اسامينا شان نحيا باطمئنان
دينق إنقلب عثمان .. هاشم بدل دلدوم
من وين ؟؟
من ام درمان وناس بيتنا منوفين
بس لكنة الرطّان تفضحنا .. بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين .. يفرقنا إلا النوم
ما الحالة من بعضا .. مطروش ومطروشة
وأكوان وقد قابل .. في كوشة عيوشة
يا التحكي دون تبكي .. وفي وشو بتعاين
شوف فيهو شن باين .. غير دمعة مقشوشة
قشوها ناس أخوان .. أكوان وعيوشة
بي صبر كم طول
على حال حا يتحول
قصر الزمان يا زول ولا الزمن طوّل
لا بد يتحول
ما فيهو من آلام .. في يوم من الأيام لي دنيا مفروشة
بالعافيي والطعام لي كل فم .. ما دام في غلابة بي ديوشا
وبجاي و بغادي قلة وكتر بوشة
تخمت حكام مندلدلة كروشة
فاوة وتفل لاقّي
ونار الغضب باقّي
تالاها محموشة
جرفت لبقة الليل وانطنبجت دينك لا عينا بي شموشة
الحال حا يتحول .. قصر الزمان يا زول ولا الزمن طول
لابد من فوقة .. ومن تنتهي الدوشة
قولاً قبل قلنا .. وكتين نصر نحيا مافي البكتلنا
قولك يا عيوشة .. يا اب نفس طماعة غاشاك ومغشوشة
الدنيا دنيانا
زرع إيدنا نديانا .. لا صيص لا كدموشة
وماك ماشي جيت غاشي .. ليك خيرها ينسبّل
لا كُتّي شحّادة .. نديك وتتوكل
لا جيتنا دنّاعة .. نمسح لك الجردل
أخرت للساعة وتلبت في حوشة
في حزك المنجل وشوالة مخموشة
ناسي انو مزروبة ..
بي شوق حبايبنا وحارساها كلوبة
وكلوبة بات ووبة .. ويات لوبة بتحوشة
يا النفسو ماهية
شن جبهة متكية
بي عمة كاكية .. وطاقية طربوشة
جنب جبهة دغرية .. العمة مكوية .. فوق راسها ملوية
ترقش بياض نية .. وبالهيبة منقوشة
زي وشم فوق أكوان .. شلخاً في عيوشة
يا جرحنا الطوّل
جاييك زمن طيب .. خيراتو ليك أول
صدقني يا طيب .. يا أرض يا جدول
كارتنو بي معول
والليلي تتجول .. عينيك مدهوشة
من كنت تتسول .. في مدينة ما هيلك ومن كوشة لي كوشة

لك الود من شاعر نقل الحرف البسيط البدوي الي جوف مشاعرنا فهزها كما تهز النخله المعطاء.... ولك انت صديق الحب والتحيه